Semeıdegi serpilis
Úkimet basshysy óńirdegi saparyn Semeı qalasynan bastady. Áýeli shaharda jóndeý jumystary júrgizilip jatqan áýejaıdyń ushý-qoný jolaǵymen tanysty. Aıta keteıik, 30 jyl boıy jóndeý kórmegen áýejaıǵa memlekettik «Nurly jol» baǵdarlamasy arqyly 10 mlrd teńgeden astam qarjy bólingen bolatyn. Jańǵyrtý qorytyndysy boıynsha áýejaı «V» sanatyndaǵy halyqaralyq áýejaılarǵa arnalǵan IKAO (Halyqaralyq azamattyq avıasııa uıymy) talaptaryna saı bolmaq. Al bul 300 jolaýshyǵa deıin tasymaldaı alatyn Boeing, Airbus, IL-76 túrindegi áýe kemelerin qabyldaýǵa múmkindik beredi. Iаǵnı, táýligine 25-30 reıske deıin, saǵatyna 200 adamǵa deıin qyzmet kórsetýge jol ashylady.
Premer-Mınıstr budan keıin qaladaǵy Jedel medısınalyq járdem aýrýhanasynda boldy. Mundaǵy operasııa jasaý, qabyldaý bólmeleri jańa Triaqe júıesine kóshirilgen. Oblystyq densaýlyq saqtaý basqarmasynyń basshysy Marat Shoranov Jedel járdem aýrýhanasy zamanaýı jabdyqtarmen qamtamasyz etilgenin, bıylǵy 8 aı ishinde 9 myńǵa jýyq naýqasqa qyzmet kórsetilgenin aıtyp berdi. Sonymen qatar osy jerde B.Saǵyntaevqa oblystaǵy «Densaýlyq» baǵdarlamasynyń oryndalýy týraly aqparat usynyldy.
Úkimet basshysy óńirdiń ındýstrııalyq damýymen, atap aıtqanda mashına jasaý salasymen tanysý maqsatynda «Daewoo Bus Kazakhstan» jáne «SemAZ» JShS-na bardy. B.Saǵyntaev avtoqurastyrý zaýytynyń jumysyn kórip, tehnologııalyq prosespen jáne qosalqy bólshekter men akkýmýlıatorlar óndirisi jelisimen, túrli daıyndaý satylaryndaǵy avtokólik qurastyrý sapasymen tanysty. Kásiporynnyń bas dırektory Ásemhan Dosqojanov 2017 jyly 3 mlrd teńgege 136 avtobýs, al bıylǵy qańtar-tamyz aılarynda 2,3 mlrd teńgeniń ónimi óndirilip, konveıerden 82 Daewoo avtobýs shyǵarylǵanyn baıandady.
Premer-Mınıstr Semeı qalasynyń zııaly qaýym ókilderimen de júzdesti. Elbasy Nursultan Nazarbaevtyń «Qazaqstandyqtardyń ál-aýqatynyń ósýi: tabys pen turmys sapasyn arttyrý» atty bıylǵy Joldaýynyń basym baǵyttaryna jan-jaqty toqtaldy. «Memleket basshysynyń bıylǵy Joldaýynyń ózgesheligi – árbir qazaqstandyqqa arnalǵandyǵynda. Joldaýdyń negizgi ózegi – halyqtyń ómir sapasyn jaqsartý. Bul rette Eńbek jáne halyqty áleýmettik qorǵaý, Densaýlyq saqtaý, Bilim jáne ǵylym mınıstrligine júktelgen sharýa jeterlik. Eńbek jáne halyqty áleýmettik qorǵaý mınıstrligi jańa jyldan bastap eń tómengi jalaqy mólsherin bir jarym esege ósirýi tıis. Al atqarýshy bılik jergilikti jerlerde memlekettik baǵdarlamalar boıynsha turǵyn úıler salýy qajet. Turǵyndar eń aldymen bala-shaǵasyn oılaıdy. Qolyndaǵy sońǵy malyn satsa da, balasy bilim alsa dep armandaıdy. Sondyqtan jas urpaqqa bilim beretin pedagogterdiń mártebesi joǵary bolýy tıis. Biz qazir Bilim jáne ǵylym mınıstrligimen birlese mektep psıhologi mamandyǵynyń mártebesin kóterýdi, olardyń jalaqysy týraly máseleni qarastyryp jatyrmyz», dedi B.Saǵyntaev.
Keńeste Ulttyq ekonomıka, Eńbek jáne halyqty áleýmettik qorǵaý, Densaýlyq saqtaý, Bilim jáne ǵylym, Investısııa jáne damý, Aýyl sharýashylyǵy mınıstrlikteri men «Atameken» UKP basshylary Joldaýdy júzege asyrý aıasynda atqarylatyn jumystar jaıly baıandady. Al Semeı qalasynyń turǵyndary Memleket basshysynyń Joldaýynda aıtylǵan bastamalardy qýattap, qoldaıtynyn jetkizdi. Kezdesýde «Fırma «Azııa» JShS-nyń quryltaıshysy Ásemhan Dosqojanov Elbasynyń áleýmettik bastamalaryna qoldaý kórsetý maqsatynda kásiporyn qyzmetkerleriniń eń tómengi jalaqy mólsherin 50 paıyzǵa kóterý týraly sheshim qabyldanǵanyn aıtty. «Biz Prezıdent Joldaýynda alǵa qoıylǵan mindetterdi iske asyrýǵa ázirmiz», dedi ol.
Shákárim atyndaǵy Semeı memlekettik ýnıversıtetiniń professory, belgili ǵalym Arap Espenbetov Memleket basshysynyń Joldaýynda pedagogterdiń mártebesin arttyrý boıynsha qoıylǵan mindetterdiń mańyzdylyǵy men ýaqtyly kóterilgenin atap ótip, Prezıdentke Abaı eli men Semeı halqy atynan ystyq yqylasyn jetkizýdi ótindi.
О́ndirisi óskeleń óńir
Úkimet basshysynyń jumys sapary odan ári Jarma aýdanynda jalǵasty. B.Saǵyntaev Baqyrshyq taý-ken óndirý kásipornynda boldy. Búgingi tańda ken óndirý kesheninde 1097 adam jumyspen qamtylyp otyr. Onyń ishinde 97,2 paıyzy – elimizdiń azamattary. Budan ózge kásiporynǵa merdiger uıymdardyń 700-ge jýyq qyzmetkeri tartylǵan. Qazirgi kezde munda jylyna 2 mln tonna ken óndiretin taý-ken baıytý kombınatyn salý jobasy iske asyrylyp jatyr. Joba ındýstrııalyq-ınnovasııalyq damý baǵdarlamasyna engen. Kásiporynǵa salynǵan ınvestısııanyń jalpy kólemi 133 mlrd teńgeden asady. О́ndiris ornyn aralaý barysynda kombınattyń bas dırektory Iýrıı Ovchınnıkov ken óndirý kesheniniń kúlli ujymy Joldaýdaǵy áleýmettik bastamalardy qyzý qoldaıtyndyǵyn erekshe atap ótip, óz kezeginde jumyskerleriniń eńbekaqysyn arttyrý máselesi qaralyp jatqanyn tilge tıek etti.
Úkimet basshysy budan keıin oblys ortalyǵyna keldi. О́skemendegi jańa shaǵyn aýdanda oryn tepken №46 orta mektepte bolyp, «Nazarbaev zııatkerlik mektepteri» derbes bilim berý uıymy talaptaryna sáıkes jabdyqtalǵan fızıka, bıologııa, hımııa jáne robotty tehnıka kabınetterin, IT-synypty aralap kórip, óńirdegi bilim berý sapasyna oń baǵasyn berdi. Mektep dırektory G.Aýǵanbaeva jańa modıfıkasııadaǵy synyptar ınteraktıvti sensorlyq taqtalarmen, mıkroskoptarmen, hımııalyq tájirıbelerge, bıologııa jumystaryna arnalǵan arnaıy jabdyqtarmen jaraqtandyrylǵanyn aıtty.
Búginde oblysta «Nazarbaev zııatkerlik mektepteri» standarttaryna sáıkes 277 orta mektepti jańa modıfıkasııalaý jáne robotty tehnıka synyptarymen jabdyqtaý jumystary júrgizildi. 1 qyrkúıekten bastap 277 jalpy bilim berý mektebinde IT-synyptary ashyldy.
Sondaı-aq Shyǵys Qazaqstan oblystyq drama teatrynda ótken oblys aktıvimen jáne qala jurtshylyǵymen kezdesý barysynda B.Saǵyntaev bastaǵan Úkimet músheleri men óńir basshysy Danıal Ahmetov Joldaý aıasynda aldaǵy ýaqytta qolǵa alynatyn jobalar týraly aıta kelip, jumys saparyn qorytyndylady. D.Ahmetov Joldaýdy júzege asyrý boıynsha ár salada keńinen óńirlik jumys jospary ázirlengenin, negizgi mindet halyqtyń ál-aýqatyn arttyrý, ómir sapasyn jaqsartý, tabysyn eseleýden turatynyn atap ótti.
Raýshan NUǴMANBEK,
Azamat QASYM,
«Egemen Qazaqstan»
Shyǵys Qazaqstan oblysy
