Eske alý sharasyna ardager jaýyngerler, áskerı qyzmetshiler men qoǵam ókilderi qatysty. Rásim barysynda tájik-aýǵan shekarasynda qyzmet atqarǵan Qazaqstan jaýyngerlerine arnalǵan eskertkishke gúl shoqtary qoıyldy.
Is-sharada Shekara qyzmeti dırektorynyń orynbasary general-maıor Tóleýjan Júnisov jáne IIM Ulttyq ulany Bas qolbasshysynyń tárbıe jáne áleýmettik-quqyqtyq jumys jónindegi orynbasary general-maıor Qaırat Úmbetov sóz sóılep, jaýyngerlerdiń áskerı boryshty abyroımen oryndaǵanyn atap ótti.
«Bul kún – batalon jaýyngerleriniń erligi men Otanǵa adaldyǵynyń, áskerı boryshqa beriktiginiń sımvoly. Osy rette batalon ardagerlerin Ulttyq ulan Bas qolbasshylyǵy atynan tarıhı datamen quttyqtaımyn», dedi general-maıor Qaırat Úmbetov.
Eske alý is-sharasy Ulttyq áskerı-patrıottyq ortalyqta uıymdastyrylǵan konserttik baǵdarlamamen jalǵasty. Baǵdarlamada Qorǵanys mınıstrliginiń, Ulttyq ulannyń, Shekara qyzmetiniń Án-bı ansambli solısteri patrıottyq baǵyttaǵy shyǵarmalaryn oryndady.
Aıta keteıik, osydan 25 jyl buryn Qazaqstannyń áskerı qyzmetshileri Tájik-Aýǵan shekarasyndaǵy jaýyngerlik mindetin aıaqtap, elge oraldy. Qazaqstan Respýblıkasynyń jeke qurama atqyshtar batalony 1993-2001 jyldar aralyǵynda Pıandj ózeni boıynda memlekettik shekarany kúzetti. О́kinishke qaraı, qyzmet barysynda qazirgi Ulttyq ulannyń, burynǵy Ishki áskerdiń 17 jaýyngeri erlikpen qaza tapqan edi.
