Qaratal aýdanynyń ortalyǵy – Úshtóbe qalasyndaǵy jańa skverdiń jalpy alańy 1,4 gektar aýmaqty alyp jatyr. Aýmaqty gúldendirip, kóz tartatyn kórkem alańǵa aınaldyrý úshin almatylyq J.Janekenov atyndaǵy jobalaý ınstıtýy men «Ankor-2005» jaýapkershiligi shekteýli seriktestigi talmaı izdenipti. Saıabaqqa qylqan japyraqty, dekoratıvti aǵashtar men gúldi butalar otyrǵyzylyp, gúlzarlarmen kómkerilgen. Adamdardyń tynystaýy úshin qolaıly jaǵdaı jasalyp, oryndyqtar qoıylǵan. Jaıaý júrginshiler joly tóselgen, jaryq shamdary ornatylǵan. Sporttyq jáne balalar oıyn alańdary bar. Skver ishindegi eń qundy alań Kemel Toqaev memorıaly bolsa kerek. Bul – soǵys ardageri, qoǵam qaıratkeri, ádebıet alybyna qoıylǵan laıyqty eskertkish.
Skverdiń ashylýyna arnaıy kelgen oblys ákimi Amandyq Batalov úshtóbelikterdi saıaly demalys orynyń ashylýy men jáne Qaratal aýdanynyń qurylǵanyna 90 jyl tolýymen quttyqtady.
- Búgin kórnekti jazýshy-jýrnalıst Kemel Toqaevtyń 90 jyldyǵyna oraı jańa skver ashyldy. «О́z eli óz erlerin eskermese, el tegi qaıdan alsyn kemeńgerdi», dep Ilııas aqyn jyrlaǵandaı, óńirimizde topyraǵynda týyp-ósken daryndy azamattardyń esimin ardaqtaý – ortaq paryzymyz. Paıdalanýǵa berilip otyrǵan jańa skver kópshilikti búgingi aýdannyń 90 jyldyq mereıtoıymen birge qýantyp otyr. 1,4 gektar jerdi alyp jatqan demalys ornynda balalar alańy men sport alańy da qarastyrylǵan. Sondyqtan bul skver qarataldyqtardyń súıikti demalys oryndarynyń birine aınalady dep senemin, - dedi aımaq basshysy óz sózinde.
Qalmahanbet MUQAMETQALI,
«Egemen Qazaqstan»
Almaty oblysy
