- Daıyndyǵymyz qarapaıym kúıde ótti. Fýtbolshylarymyzdyń barlyǵy daıyn. Erteń biz jaqsy deńgeıdiń oıynyn kóre alamyz. Osyǵan deıingi matchtarda biz jaqsy oıyn kórsettik.
- Astanada ótken jattyǵý jıyndarynda nege kóńil bóldińiz?
- Eń aldymen biz fýtbolshylardyń qaıta qalypqa kelýine kóńil bóldik. Olardyń basym bóligi jeksenbi men beısenbi kúni matchtar ótkizdi. Kapıtan Shomkonyń kishigirim jaraqaty bolǵan, alaıda ol erteńgi oıynǵa daıyn.
- Latvııa quramasy jaıly ne aıta alasyz? Olardyń basym túsetin tustary bar ma?
- Latvııa óziniń kórsetip júrgen nátıjelerine sáıkes emes. Olar negizi jaqsy kórsetkish ala alatyn komanda. Olar qoryqpaı oınaıdy. Latvııa bizdiń lıgada ekinshi sebette. Olar reıtıng boıynsha bizden joǵary tur. Biraq, bir ǵana match jaıly aıtyp qaraıtyn bolsaq, oıyn tartysty ári teń dárejede ótýi múmkin.
- Latvııa fýtbolymen qandaı da bir estelikterińiz bar ma?
- Iýrmalada bir kezdesý ótkizgenim esimde. Biraq, sol kezde meniń shákirtterim qarsylasty kishkene mensinbeı shyqqandaı boldy. Sonyń saldarynan Chempıondar lıgasynyń kelesi kezeńine ótý sál qıyndaý boldy.
- Qazaqstan chempıonatynda «Aqjaıyq» úshin oınaıtyn Karashaýskas jaıly ne aıtasyz?
- Karashaýskas jaıly bilemin. Ol ishki birinshilikte jaqsy oınap júr. Latvııalyq fýtbolshylar kombınasııalyq oıyn kórsetedi. Olar eýropalyq mánerde oınaıdy.
- Qazaqstan quramasynyń oıynshylary túgelge derlik ishki birinshilikte oınaıdy. Bul Sizdiń quramańyzǵa qalaı áser etedi?
- Bul saýalǵa birneshe jaýap bar. Ulttyq qurama deńgeıinde bul másele kóp áser etpeýi múmkin. Eger qurama oıyny birkelki, ári oıynshylar bir-birin jaqsy túsinip tursa. Ekinshi jaǵynan fýtbolshylardyń myqty birinshilikte oınaǵany ulttyq quramaǵa jaqsy. Sebebi, ol oıynshylar komanda oıynyna óziniń kórgen bilgenin alyp keleri anyq.
- Quramanyń deni «Astana» men «Qaırattyń» oıynshylary. Olar bir-birimen komanda ishinde bólinip júrgen joq pa?
- «Astana» men «Qaırat» oıynshylary quramada bólinip júrgenin baıqamadym. Bolgarııa quramasyn baptaǵan kezde de ártúrli básekeles komandalardyń oıynshylary bolǵan. Biraq, olar quramaǵa kelgen kezde barlyǵyn umytady. Sol sekildi bizdiń komanda da ekige bóliný degen joq. Qazir, quramada kóptegen ózgerister bar. Olar bóliný týraly oılap ta júrgen joq.
Ermuhamed MÁÝLEN
