Elge qamqorlyq rýhy esedi

Elbasy Nursultan Nazarbaev­tyń Qazaqstan halqyna arnaǵan Joldaýynyń basty ereksheligi árıne onyń áleýmettik turǵydan az qamtylǵan, álsiz qamtylǵan qalyń halyq qamyna baǵyshtalýy boldy. Búginde úlken qalada nemere­le­rimizdi jetektep balabaqshaǵa baramyz, mektepke baramyz, aýrýhanaǵa baramyz. Sonda aldymyzdan adam aıtsa nanǵysyz aılyq alatyn jas ustazdar shyǵady, tárbıeshiler, medbıkeler shyǵady. Biz yńǵaısyz kúıge túsemiz. Mardymsyz aılyq alatyn adamnan qalaı mardymdy jemisti jumys talap etýge bolady?! Joldaý osy kemshiliktiń ornyn toltyrýǵa baǵyttalǵan. Ra­synda balabaqsha, mektep biz­diń bolashaǵymyzdy terbetken tal besik emes pe? Odan nege qarjy aıaýǵa tıispiz?! Nemese óz den­saý­lyǵymyzdan ózimiz nege qarjy aıaýǵa tıispiz? Joldaý osynaý áleý­mettik turǵydan álsiz qamtylǵan kópshiliktiń eń tómengi jalaqysyn 1,5 esege kóterdi. Jáne aldaǵy jyl­dy «Jastar jyly» dep jarııa­lady. Almatyda turamyz. Sońǵy shırek ǵasyrda jastar aýyldan Almatyǵa shubyrdy. Qaıda qarasań da myqshyńdap qalanyń qara jumysyn istep jatqan jastardy kóremiz. Bári keshegi aýyl jastary. Kóbi úılenbegen. Úılený úshin úı kerek. Úı alýǵa qalta juqa. Minekı, búginde júzdegen myń jastardyń basynda bar osynaý problemalardy shapshań sheshýdiń joldaryn nusqap otyr jańa Joldaý. 

Aldaǵy «Jastar jylynda» sol páterden páterge kóship júrgen júzdegen myń jastardyń baspana máselesin sheshýdiń joldaryn kórsetti. Júzdegen mıllıard qarjy bólindi. Jurtqa unaǵany sol, Elbasy jergilikti ákimderge qatty aıtty. Qadap aıtty. «Qolyńa qarajat berildi. Sony únemdep jumsa! Shashpaı-tókpeı halyqtyń qamyna jumsa! Qalaı da halyqtyń áleýmettik máselesin shesh» dedi. Mektep muǵalimderiniń mártebesin kóteretin zań qabyldaý qajettigin aıtty Nursultan Ábishuly. Bul tipti jurt kútpegen jańalyq boldy. Elimizde sońǵy elý jylda ustaz bedeli túsip ketkeni ras. Ja­laqysy az bolǵannan keıin mek­tepke er adamdar barýdy qoıdy. Mektepterde er ustaz­dar­dyń joq bolýy ul balalar tár­bıesine keri áser etti. Mek­tep mu­­ǵalimderin sabaqtan tys jı­­na­lys­tarǵa qýalaı berý ádetke aınaldy. Demek, jańa zań budan bylaı muǵalim mártebesin kóteredi dep úmittenemiz. Joldaýdyń ón boıynan osyndaı qalyń halyq qamyna arnalǵan qamqorlyq rýhy esip turdy. Laıym osy qamqorlyq halyq ıgiligine aınalǵaı! 

Smaǵul ELÝBAI,

jazýshy