Babalar amanatyna asqan jaýapkershilikpen qaraıtyn jas qaýym Sákenniń óz qoltańbasy qalǵan qundy jádigerlerin kórip, kóp dúnıeni kóńilge túıip qaıtty.
Sádýaqas Seıfýllın atyndaǵy ádebı-memorıaldyq mýzeıi 1988 jyly ashylǵan. XIX ǵasyrdyń ekinshi jartysynda salynǵan bul ǵımarat buryn kópes Kazansevtiń ákimshilik úıi bolǵan. 1920 jyldary atalmysh ǵımarattaǵy redaksııada Sáken qyzmet etken. Mýzeıdiń janyndaǵy aqynnyń alyp eskertkishi de jas urpaqty taý tulǵalarǵa taǵzym etýge shaqyryp turǵandaı áser qaldyrady.
Alǵash mýzeı ashylǵan jyldary qorda jalpy 600-700-ge jýyq jádiger bolsa, qazirgi sany 6000-ǵa tolyqqan. Onyń ishinde 2900 bastapqy, 3100 ǵylymı-qosalqy qor. Murajaıda kórinis tapqan aqynnyń óz qoljazbalary, qoldanǵan sııasaýyty, muraǵat, qujattary onyń jastyq shaq, eńbek joly, qaıratkerlik kezeńinen bastap tolyq maǵlumat beredi. Mýzeıdegi jas Sákenniń portretteri, kıgen kıimderi, qol saǵat, átiri kóz aldyńa syrbaz, symbatty Sákendi eriksiz alyp keledi.
Odan bólek, murajaıdan Aqan seri, Birjan sal, Alashtyń bes arys, úsh báıteregi jaıly da ǵylymı qujattardy tabýǵa bolady. Qundy jádigerler men mańyzdy maǵlumattar alǵan birlestik músheleri aqynnyń arabsha jazylǵan óleńin tárjimalap jarysyp, onyń «Tar jol, taıǵaq keshý» romany boıynsha jasalǵan kartany qyzyǵa tamashalady.
Sonymen qatar, olar murajaı muraǵatyndaǵy Sákenniń «Qazaqty qazaq deıik, qateni túzeteıik», «Keńselerde isti qazaq tilinde júrgizýge kirisý», «Ult teatry týraly» atty maqalalaryn oqyp, aqyn óleńderi jelisinde salynǵan kartınalarǵa erekshe yqylas tanytty.
Ekskýrsııa sońynda mýzeı qyzmetkerleri munda dástúrli túrde Sáken oqýlary bolyp turatynyn, aqynǵa arnalǵan ǵylymı-konferensııalar ótetinin tilge tıek etti. Osylaısha, jastar Alashtyń aıaýly aqynynyń syr sandyǵyna úńilip, tuǵyrdaǵy eskertkishin kórip qaıtty.
Astananyń rýhanı ortalyǵynyń birine aınalǵan mýzeı Sáken Seıfýllın murasyn urpaqqa nasıhattaýda jáne jastar arasyndaǵy shyǵarmashylyq ıntellıgensııany qalyptastyrýda úlken ról atqaryp tur.
Ásem BEKTEMIRQYZY,
Eýrazııa Ulttyq ýnıversıtetiniń stýdenti
