Rıdder qalasynda júregine izgilik uıalaǵan Galına Gılderman esimdi jan turady. Ol kisini shaǵyn shaharda tanymaıtyn kisi joq deýge bolatyn shyǵar. «Gıldermannyń otbasy jıyrma jyldan astam óńirimizdegi jetimderge kómek berip, áleýmettik jobalarǵa belsene qatysady. Eki jyldan beri baspanasy joq, qańǵyryp júrgen jandardy jınap, olardyń qujattaryn qalpyna keltirip, qoǵamǵa paıdaly azamat retinde qaıta qosylýyna kóp kúsh-jigerlerin salyp júr. Gıldermannyń otbasy – ınternasıonaldy. Joldasy Baı-Elı Saıdsolımovıchtiń ulty – cheshen, ózi nemis qyzy. Ekeýiniń de áke-sheshesi 1957 jyly Qazaqstanǵa qonys aýdarylypty. Osy jerde úshinshi urpaqtary dúnıege kelgendikten, Qazaqstandy Otanymyz dep qurmet tutady», – deıdi Rıdder qalalyq ishki saıasat bóliminiń basshysy Anar Oralqyzy.
Galına Gılderman jaqynda Rıdderde «Rýhanı jańǵyrý» baǵdarlamasynyń aıasynda ótken «Jomart júrek» qaıyrymdylyq forýmynda «Jyl tulǵasy» atalymy boıynsha marapattalypty. Júregi jomart kásipker jyl basynan beri qaladaǵy qaıyrymdylyq sharalaryna úsh mıllıon teńgeden astam qarjysyn jumsapty. О́ziniń «Rıabınýshka» degen dámhanasynda múgedek jandar men jalǵyzilikti zeınetkerlerge, uzyn sany 57 adamǵa kún saıyn bir mezgil tegin ystyq tamaq berýdi dástúrge aınaldyrǵan eken. Osyndaǵy jetim balalarǵa arnalǵan arnaıy korreksııalyq mektep-ınternattyń tárbıelenýshilerine de únemi járdemdesip turady. Júıke aýrýlary dıspanserinde jatqan 41 muńlyqqa da Galına Mıhaılovnanyń júregi aýyrady. «Olardyń barlyǵyn týystary umytyp ketken, eshkimge kerekteri joq. Máńgilik mekenine osy jerden attanatyndary da kezdesedi. Jarymkóńil jandardy bir ýaqyt qýantý úshin merekelik is-sharalar uıymdastyramyz. Endi bir teledıdar syılaıyq dep júrmiz», deıdi ol.
Reti kelgende aıta keteıik, Rıdder qalasynda sońǵy eki jylda 70-ten astam ártúrli qaıyrymdylyq sharalary uıymdastyrylyp, qoly ashyq jandardyń qoldaýymen 100 mıllıon teńgeden astam qarajattyń áleýmettik kómegi kórsetilipti. «Jomart júrek» qaıyrymdylyq forýmynda Atymtaı jomart azamattar «Eren eriktilik», «Jyl tulǵasy», «Jyldyń úzdik uıymy», «Týǵan ólkem», «Jyl mesenaty» atalymdary boıynsha marapattalypty.
Azamat QASYM,
«Egemen Qazaqstan»
Shyǵys Qazaqstan oblysy,
Rıdder qalasy
