Aqtóbe oblysynyń ákimi óńirdiń bıylǵy 9 aıdaǵy áleýmettik-ekonomıkalyq damýynyń negizgi nátıjeleri jóninde baıandady.
– Esepti kezeńde áleýmettik-ekonomıkalyq damýdyń barlyq negizgi kórsetkishteri boıynsha ósý qarqyny saqtalyp otyr. О́nerkásip ósimi – 105,7 paıyz. Jalpy, qańtar-qyrkúıek aılarynda óndirilgen ónimniń quny 1,3 trıllıon teńgeden asty. Aýyl sharýashylyǵy óniminiń jalpy kólemi 167,3 mıllıard teńgeni nemese 104 paıyzdy qurady. Osy aıda 85 myń sharshy metr turǵyn úıdi paıdalanýǵa berý josparlanyp otyr. Bul byltyrǵy osy kezeńmen salystyrǵanda 22,1 paıyzǵa artyq. Bıylǵy 9 aı ishinde 318 mıllıard teńgeden astam ınvestısııa tartyldy, – dedi B.Saparbaev.
Sonymen qatar, óńir basshysy negizgi memlekettik baǵdarlamalardyń, sonyń ishinde «Bes áleýmettik bastamanyń» júzege asyrylý barysy jóninde esep berdi.
Baıandamany tyńdaǵan soń, Nursultan Nazarbaev «Qazaqstandyqtardyń ál-aýqatynyń ósýi: tabys pen turmys sapasyn arttyrý» atty halyqqa arnalǵan joldaýdy tıimdi iske asyrýdyń mańyzdylyǵyn atap ótip, oblystaǵy ortasha jalaqyny ósirý, jergilikti mańyzy bar joldardy jóndeý jáne óńirdiń, ásirese Aqtóbe qalasynyń ekologııalyq ahýalyn jaqsartý jóninde birqatar naqty tapsyrma berdi.
«Aqtóbe» ındýstrııalyq aımaǵynyń kólemi 200 gektar jerdi qamtıdy. Onda ınjenerlik-kommýnıkasııalyq ınfraqurylym, avtomobıl jáne temir jol kólikterine arnalǵan kirme joldar bar. Búginde munda jalpy quny 60,3 mıllıard teńge bolatyn 14 ınvestısııalyq joba júzege asyrylýda.
