...úlgi etedi
Ortalyq ataýy – «Anaǵa taǵzym»
Bıyl araıly Aqtóbede erekshe «Anaǵa taǵzym» atty jarqyn da, jasampaz joba jasaqtaldy. Men ony barsha el-jurt pen turǵyndarǵa jáne keıingi urpaq ókilderine qajetti rýhanı-mádenı ortalyq dep sanaımyn. Biregeı joba elimizdiń barlyq óńirlerine úlgi bolýǵa ábden tatıdy.
Aldaǵy ýaqytta munda qyz-kelinshekterge, sondaı-aq áıelder men analarǵa arnalǵan mándi de mazmundy basqosýlar men kezdesýler, trenıngter men sheberlik saǵattary ótkizilmek. Sonymen birge jetkinshek urpaqtyń boıynda otanshyldyq sezimdi qalyptastyrý úshin salt-dástúrlerimiz ben búgingi rýhanı qundylyqtardy dáripteý baǵytynda da keshendi is-sharalar júrgizilmek. «Anaǵa taǵzym» degen ataýynan kórinip turǵanyndaı, ortalyqtyń basty maqsaty – ejelgi tarıhymyzdan elge málim ana-ájelerimizdiń esimderin ulyqtap, keıingilerge ónege etip, óshpes rýhtaryna taǵzym etý bolyp otyr.
Kúlshat MASALIMOVA,
oblystyq isker áıelder
qaýymdastyǵynyń tóraıymy
AQTО́BE
...maqtan tutady
Jaqsylyq jasaýǵa umtylaıyq
Tamyz aıynyń basynan bastaý alǵan dástúrli respýblıkalyq «Mektepke jol» aksııasy kıeli Túrkistan shaharynda da belsendi túrde ótkizilýde. Atalǵan aksııanyń maqsaty – az qamtylǵan jáne kóp balaly otbasylar, jetim balalar men ata-ana qamqorlyǵynsyz qalǵan balalarǵa jańa oqý jylyna daıyndyq kezinde jáne áleýmettik sebeptermen mektepten qalyp qoıatyn balalarǵa kómek kórsetý.
Túrkistan qalasy aýmaǵynda byltyrǵy oqý jyly barysynda memleket tarapynan «Jalpyǵa mindetti bilim qory esebinen» 461 bala mektepke qajetti kıim-keshekpen, oqý quraldarymen qamtylǵan bolatyn. Sonyń ishinde Maıdantal aýylynyń jalpy bilim berý orta mektebinde de osyndaı qaıyrymdylyq sharalardyń basy-qasynda bolyp, balalardan óz kómekterin aıamaıtyn birqatar azamattardy aıta ketýge bolady. Atalǵan ıgi iske jeke kásipkerler men mektebimizdiń túlekteri, Astana qalasyndaǵy «Nur» bazarynyń jastary úlken úles qosyp, balalarǵa mektepke qajetti kıim-keshekpen, oqý quraldarymen jylda qamtamasyz etip otyrady. Osy oraıda óz jalǵasyn taýyp jatqan sharaǵa elimizdiń bolashaǵy jas óren balalarymyzdan kómegin aıamaıtyn, barsha azamattarymyzdy demeýshilik jasaýǵa shaqyramyz.
Áıgerim SANǴYLBAEVA,
«Maıdantal» jalpy orta mektebiniń
áleýmettik pedagogi
TÚRKISTAN
...rızashylyǵyn jetkizedi
Shaǵyn fýtbol alańyn salyp berdi
«Týǵan jer» baǵdarlamasy sheńberinde óz aýylyna Aqmola oblysy, Esil aýdanynyń turǵyny salyp bergen jasandy jamylǵysy bar shaǵyn fýtbol alańyna búginderi kópshilik rıza.
«Internasıonalnyı» aýylyndaǵy orta mekteptiń janynan salynǵan sport alańynyń qurylysyn Qazymbek Aqmaǵambetov basqaratyn «Shyńǵys han» JShS qolǵa alyp, osy maqsatta seriktestik esebinen 10 mıllıon teńge qarjy jumsalǵan eken. Internasıonalnyı selolyq okrýginde 700-deı turǵyn bolsa, onyń 200-deıi jastar. Sondyqtan qazirgi zamanǵa saı jabdyqtalǵan jańa shaǵyn fýtbol alańy aýyl jastarynyń buqaralyq sportpen shuǵyldanýyna zor septigin tıgizip otyr.
Kásipker Qazymbek Aqmaǵambetov buryndary osy aýylda muz aıdynyn da ashqan bolatyn.
Aslan OSPANOV
Aqmola oblysy
...oı qozǵaıdy
Mektepte hıdjab kııý durys pa?
Osyndaı taqyryppen Ushtaǵan selosyndaǵy Asqar О́tepbergenov atyndaǵy orta mektepte aýdandyq ishki saıasat jáne tilderdi damytý bólimi men Mańǵystaý aýdany ákimdiginiń aqparattyq túsindirý tobynyń uıymdastyrýymen dóńgelek ústel ótken bolatyn.
Jıynda asyl dinimizdiń kazirgi tańdaǵy qoǵam arasyndaǵy keń taralýy, basqa dinı uıymdarynyń jastar sanasyn ýlaýy men keri áser etýleri, sondaı-aq mektepte hıdjab kıetin jastardyń kóbeıýi alańdatatyny jaıynda áńgime órbip, aýdannyń naıb ımamy, teolog Erbol Aınaqulov: «Hıdjab – ol oraný degen maǵyna beredi. Ol oranǵanda bilim berý uıymynda tumshalanyp oraný aǵattyq dep oılaımyn. О́ıtkeni bizdiń elimiz Qazaqstan zaıyrly memleket bolǵandyqtan mekteptiń óz tártibi men erejesi bar. Soǵan baǵyný kerek», degen oıyn jetkizdi.
Sharada aýyl jastary «Jıhad degen ne?», «Sektanyń aıyrmashylyǵy qandaı?» degen suraqtaryn qoıyp, teolog tarapynan tushymdy jaýaptaryn aldy.
Allabergen QONARBAEV
Mańǵystaý oblysy,
Mańǵystaý aýdany
...armanyn aıtady
Jýrnalıst bolǵym keledi
Meniń de jýrnalıster qataryn tolyqtyrǵym keledi. Tynymsyz ómirdegi aqparat tolqynynda erkin júzip, keleli derek kózderin halyqqa jetkizýdi qalaımyn. Jýrnalıst – tek habarshy, jańalyq jarshysy ǵana emes, ár aqparatty oı eleginen ótkizip, aqıqatty qaq jaryp, aıtar oıdy naq aıtyp, qadamyn dóp basyp júre alatyn, tarazynyń basyn teń ustap tura alatyn maman. Meniń oıymsha, naǵyz tilshi – aqyldyń tereńdigimen, qııaldyń ushqyrlyǵymen, oıdyń keńdigimen toptan bólinip, erekshelenetin adam. Oǵan qosa, maqsatker, talapshyl, tez til tabysqysh jandar. Qalamy men qaǵazy arqyly qorǵansyzǵa pana bolyp, ádildikke qol jetkizgende bireýge úmit uıalatatyn «tórtinshi bılik» ıeleri. Únemi izdenis ústinde júretin jandardyń ótkir tildi sheshen bolýy da qajettilik týdyrady.
11 synypqa qadam basqaly otyrǵan jas túlekterge ərdaıym qoıylatyn saýal «qaı mamandyqqa baraıyn dep otyrsyń?» degende, taısalmastan jýrnalıst bolamyn deýshi edim. Sol bir kishkentaı arman bolashaqqa jeteledi. Osy kúnge deıin aldyma maqsat qoıyp: qaıtsem de osy salany meńgeremin, qabiletimdi ushtaımyn degen edim. Mamandyq tańdaýda túpqııanym osy. Joǵary synypqa aıaq basqaly «jýrnalıst» degen beıməlim termınniń qyr-syryn tanyp úırene bastadym.
Janerke SAǴYMJAN
Shyǵys Qazaqstan oblysy,
Úrjar aýdany
