Qudaıym-aý, jaratqan ıemiz de Quran Kárimde: «Adam balasyn eń kórkem músinde jarattym», deıdi. Rasynda, bizdiń túr-tulǵamyz ben tik júrýimiz jer betindegi ózge tirshilik ıelerine qaraǵanda symbatty ekeni aıdan anyq. Táńirden asqan sýretshi joq bolsa da, jasandy sulýlyqqa degen talas endi tolastamaıdy.
Sonymen qazirgi tańda Qazaqstanda eń kóp taralǵan plastıkalyq ota túrleri – blefaroplastıka, ekinshi orynda – omyraý úlkeıtý tur. Úshinshi, tórtinshi oryndarǵa smas-lıftıng pen lıposaksııa talasady. Demek áıelderdiń talǵamy ózgere bastady. Biraz jyl buryn ǵana qyz-kelinshekter birinshi kezekte mammoplastıkany kóbirek tańdap kelgen. Al bókse úlkeıtý – glıýteoplastıkaǵa bizdikiler qazir kóp júgine bermeıtin kórinedi. Esesine eýropalyq pishinmen qabaq kestirýge áýester kóbeıdi.
Osydan birneshe jyl buryn ǵana álemde jylyna 18 mıllıonǵa deıin plastıkalyq operasııa, onyń ishinde 10 mıllıonnan astamy hırýrgııalyq jolmen jasalynatyny jarııalanǵan-dy. Eger qyz-kelinshekterdiń kópshiligi ári jas ári ádemi kórinýdiń jolynda pyshaqqa túskenin barynsha jasyryp baǵatyndyǵyn eskersek, bul kórsetkishke asa sene berýge bolmas.
Sol sııaqty plastıkalyq hırýrgtiń qyzmetine júgingen álemge tanymal óner juldyzdary men áleýmettik jeliniń sulýlary bul istiń bazaryn júrgizip tur. Esesine osy operasııanyń kesirinen sıqy qashqan tanymal tulǵalardyń reıtıngi eshkimdi qorqytpaıdy. Sulýlyq – qurbandyqty qalaıdy deıtin qaıtpas qaǵıdattyń saldary áli ádemilik qýǵandardy shoshytyp otyrǵan joq.
Plastıkalyq hırýrgter bet músheleri bólek-bólek qartaımaıtyndyqtan, keshendi túrde ony pyshaqpen kesip-pishedi. Olar úlken táýekelge bara otyryp, nátıjesi úshin túpkilikti kepildikti eshqashan bergen emes. Al tabıǵattyń bir- birimen minsiz jalǵastyryp turǵan tinderi men jasýshalaryn, kózge kórinbes qan tamyrlary men júıke talshyqtaryn qııý – densaýlyqqa zııanyn báribir tıgizbeı qoımaıtynyn medısınalyq bilimi joq adam da ishki túısikpen sezedi...
Alaıda osynyń birine qaramastan, jasandy sulýlyq saltanat quryp tur.
– Qazirgi úrdis pen tájirıbe bizge qazaq qyzdarynyń eýropalyqtarǵa elikteıtinin kórsetedi. Koreıadaǵy sııaqty bizge jastarymyz juldyzdardyń neshe túrli sýretterin alyp keledi. Olardyń arasynda Instagram paraqshalardan alynǵan bıkeshter, ıakı modelder de bar. Bulardyń bári klassıkalyq eýropalyq qas-qabaq, baqyraıǵan kóz, jabysqan jaq, tompaq, dúrdıgen erin, sopaq bet bolyp keledi. Mundaı jaǵdaıda biz klıentterge asa qajettilik bolmasa, Qudaıdyń bergen kelbetinen bas tartpaýǵa keńes berip baǵamyz. Biraq degeninen qaıtpaıtyndar báribir hırýrg pyshaǵynan qoryqpaıdy. Máselen, lıposaksııany alaıyq, bul operasııa – artyq maılardy azaıtqanymen, báribir aryqtadyń degendi bildirmeıdi. Lıposaksııadan aryqtaǵan áıeldi men áli kezdestirgen joqpyn, – deıdi qazaqstandyq plastıkalyq hırýrg Alekseı Kýımov.
Ne desek te, halqymyzdyń sulýlyqty «oımaq aýyz», «kúlim kóz» dep sýrettegen qalybynan shyqpaǵanda saqtaı alatynymyz aıdan anyq. Áıtpese qazir jastarymyz jekemenshik sulýlyq salondaryn ashyp, óz betinshe kosmetolog bolyp júrgender arqyly jasandy kirpik jabystyrýǵa asa úıir.
Bul týraly da tájirıbeli kosmetolog Gúlshash Áýbákirqyzy: «Jelimniń hımııalyq quramy óte joǵary, kózge tıgizetin zııany da kóp, jelimmen jalǵanǵan kirpikterden keıin adamnyń óz kirpikteri saýdyrap túsip qalady. Kosmetologııalyq jelim degen jelim bolmaıdy. Men kirpik jalǵatýǵa kelgen adamǵa jasatpaýǵa keńes beremin. Árıne bir aptaǵa deıin ádemisi ádemi, al odan keıingi zııany qanshama?! Qazir kosmetologııa damyǵan. Jasandy kirpik jabystyrmaı-aq, kirpikti titirkendirý arqyly dárýmendermen qorektendirip, ósirýge bolady.
Osy salada júrip, maman retinde men de biraz oı túıdim. Qazir qyz-kelinshekter sulý kóriný úshin botoks sııaqty ádistermen betiniń janyn ketirip, qabaǵyn keskizip, bárine barady. Tipti sapasyz plastıkalyq operasııalardan ólip ketip jatqandar da bar. Mine, osynyń bári aqsha tabýdyń kesirinen bolyp jatyr. Qanshama áıel óziniń tabıǵı túrinen aıyrylyp, aınaǵa qaraýǵa júregi daýalamaıtyn jaǵdaılar oryn alýda. Adamnyń densaýlyǵy men kelbetine qatysty kásippen aınalysatyndar birinshi kezekke adaldyqty, sapany qoıý kerek. Qaýipsiz bolýyna jaýapty bolýy tıis», deıdi.
– Al dorba aýyzdarǵa kelsek, qazaqtyń qıǵash qas, alma moıyn, oımaq aýyz dep áspettegen sulýlarǵa arnalǵan teńeýi bizden alystap barady. Qazir eresek áıelderdiń ózi ernine gel quıǵyzyp, aýzyn dúrdıtip alatyny asa ersi kórinse de kóp. Birinshiden, bul tabıǵı emes ekendigi birden kózge túsip turady, ekinshiden, durys sóıleı almaı, jansyzdanǵan ernimen tamaqty da durys ishe almaıdy. Bizdiń qazaq tabıǵı kórikti baǵalaǵan. Eń soraqysy salpıǵan erinder keıde isinip, qabynyp, irińdep, sońy jaqsy bolmaı jatady. Munyń arty nemen aıaqtalatynyn aıtpasa da túsinikti. Búgingi tańda erindi ádemi tompıǵan, balǵyn etip kórsetýdiń túrli ádisteri men ınnovasııalyq zertteý joldarymen jasalǵan erin dalaptary qazir kóptep tabylady, – deıdi «Gulshash_spa_salon» dırektory Gúlshash Áýbákirqyzy.
Árıne, áıel balasynyń ádemilikke degen qushtarlyǵynda turǵan esh oǵashtyq joq. Biraq erteńdi oılasaq, densaýlyqty, urpaqty oılasaq, plastıkalyq hırýrgke bararda on ret oılanyp, qyryq ret tolǵanǵan jón-aý.
Aınash ESALI,
«Egemen Qazaqstan»
ALMATY
