Ǵ. Ibraımov búgingi tańda Jekeshelendirýdiń 2016–2020 jyldarǵa arnalǵan keshendi jospary aıasynda kólemdi jumystar atqarylyp jatqanyn aıtty. Onyń aıtýynsha, jekeshelendirý prosesindegi mańyzdy kezeń — jekeshelendirýden keıingi baqylaý.
«Biz jekeshelendirilgen nysandar boıynsha satyp alý–satý kelisimsharty aıasynda ınvestorlar ózderine alǵan mindettemelerdiń oryndalýyn baqylaıtyn bolamyz», — dedi Ǵ. Ibraımov.
Budan ózge, 444 satylǵan nysannyń 36%-ǵa jýyǵy aýksıondarda satylǵany atalyp ótti. Aýksıondarda satýdyń máni qandaıda bir sharttardyń bolmaýynda: kim kóbirek aqsha berse, sol utady. Qalǵan 64% jaǵdaıda aktıvter tenderler men jekeshelendirýdiń basqa túrleri arqyly satyldy.
Memlekettik múlik týraly zańǵa sáıkes, úsh satylymnyń qorytyndysy boıynsha nysandar satylmaǵan jaǵdaıda, ol taratylady.
«Eger biz úsh ret satylymǵa shyǵaryp, satyp alýshysy tabylmasa, onda nysannyń suranysqa ıe bolmaǵany», — dep túsindirdi Ǵ. Ibraımov, sondaı-aq, birinshi kezekte, jekeshelendirý ekonomıkaǵa memlekettiń qatysý úlesin qysqartý maqsatynda júrgiziletinin eske saldy.
Suranysqa ıe emes nysandardy joıý — memlekettiń qatysýyn azaıtýdyń bir quraly. Nysandardy joıý Azamattyq kodekske sáıkes júrgiziledi. Joıýdan keıin qalǵan múlik basqa zańdy tulǵalar arasynda qaıta bólinedi.
Sondaı-aq, QR Qarjy mınıstrliginiń málimeti boıynsha, qazirgi tańda Jekeshelendirýdiń keshendi josparynda sheteldik ınvestorlardyń qatysýy 6% quraıdy. Jalpy alǵanda, sheteldik ınvestorlardan shamamen 70 mlrd teńge tústi. Sonymen qatar, Ǵ. Ibraımov sheteldik ınvestorlardyń qatysý úlesi aıtarlyqtaı ósýi kerek dep sanaıdy.
О́z kezeginde qarjy vıse-mınıstri Berik Sholpanqulov aldaǵy ýaqytta bıýdjetti tıimdi ıgerý boıynsha júrgizilip jatqan jumystar týraly aıtyp berdi. Onyń aıtýynsha, Qarjy mınıstrliginde apta saıyn árbir bıýdjettik ınvestısııa men shyǵyndar boıynsha bıýdjettik qarajattardy ıgerýge elektrondy onlaın-monıtorıng júrgizilip otyrady.
«Biz apta saıyn memlekettik organdarmen olardyń qarajattardy ıgerý problemalary boıynsha kezdesý ótkizemiz. Aǵymdaǵy bıýdjetti naqtylaý kezinde jyl sońyna deıin ıgerilmeý qaýpi bar shyǵyndardyń bir bóligi qaıta bólindi. Atalǵan qarajattar Memleket basshysynyń Joldaýy men bastamalary negizinde baǵyttaldy. Jalpy, kúrdeli máseleler taldanyp, sheshilip jatyr. Keleshekte zań jobasyn Parlamentke jibergen sátten bastap kelesi jyldyń barlyq memlekettik satyp alýlaryn jarııalaýdy jón sanaımyz, bul qańtar aıynan bastap memlekettik satyp alýlar jáne kelisimsharttar jasaý prosesin edáýir bes aıǵa tezdetýge múmkindik beredi. Qarjy ekonomıkaǵa jiberiledi», — dep túıindedi B. Sholpanqulov.
