Atalǵan qyzmetterdiń basshylaryna kiltterdi saltanatty tapsyrý kezinde oblys ákimi Erlan Qoshanov Prezıdenttiń halyqqa Joldaýynda polıseılerdiń basty mindeti turǵyndardyń senimine ıe bolý ekendigin aıtqanyn eske salyp, tártip saqshylary men qutqarýshylarǵa nátıjeli jumys tiledi.
– Jyl saıyn oblystyń ishki ister departamenti men tótenshe jaǵdaılar departamentiniń materıaldyq-tehnıkalyq turǵyda qamtamasyz etilýine oblystyq bıýdjetten qarajat bólinedi. О́tken jyly biz polıseılerge 150 qyzmettik kóliktiń kiltin tabys etsek, bıyl tártip saqshylary taǵy 127 birlik kólikke, al qutqarýshylarymyz 10 birlik arnaıy tehnıkaǵa ıe boldy, – dedi E.Qoshanov.
Jańa kólikterdi jol polıseıleri, óńirlerdegi tártip saqshylary men ýchaskelik polısııa qyzmetkerleri paıdalanatyn bolady.
– Bul bizdiń qoǵamdyq tártipti saqtaýda, qylmystardy izin sýytpaı ashý barysynda jedeldiligimizdi arttyratyn bolady, – dedi oblystyq IID bastyǵy Mergenbaı Japparov. – Jyl saıyn biz eski tehnıkany shyǵysqa shyǵaramyz. Bıyl qyryqqa tarta avtokólik qoldanystan shyǵarylady. Áli de bolsa avtomobıl parkiniń jańartylýyna muqtajbyz. Bul turǵyda oblys basshylyǵy bizge aıtarlyqtaı kómek kórsetip keledi.
Oblystyq TJD bastyǵy Ibragım Kúlshimbaevtiń aıtýynsha, sońǵy eki jylda vedomstvonyń materıaldyq-tehnıkalyq jabdyqtalýy aıtarlyqtaı jaqsaryp, kólik quraldarynyń 20 prosentteıi jańartylǵan. Al bıyl qutqarýshylarǵa arnalǵan arnaıy tehnıkany satyp alýǵa 206,2 mln teńge jumsalypty.
– Basqa oblystarmen salystyrǵanda, jol talǵamaıtyn kólikter sanynyń eń kóbi bizde. Olar kóktemgi sý tasqyny men qar basyp qalǵan kezderde dalada izdestirý-qutqarý operasııalaryn iske asyrý úshin qajet. Osyǵan deıin qalyń qar men mı batpaqta júretin úsh kólik bolǵan, endi taǵy bireýi satyp alyndy, – deıdi TJD bastyǵy.
Qutqarýshylar ıe bolǵan taǵy bir jańa tehnıka – Belarýs elinde shyǵarylǵan 32 metrlik avtobúgilmeli arnaıy kótergish. Ol órt sóndirýshilerge bes mınýt ishinde toǵyz qabatty úıdiń tóbesine shyǵýǵa múmkindik beredi. Mundaı arnaıy tehnıka záýlim úıleri bar iri qalalarǵa aýadaı qajet.
Qaırat ÁBILDA,
«Egemen Qazaqstan»
QARAǴANDY
