Konferensııaǵa Ulybrıtanııa, Fınlıandııa, AQSh, Qytaı, Reseı, Germanııa, Nıderlandy, Norvegııa, Armenııa, О́zbekstan, Qyrǵyzstan jáne taǵy basqa alys-jaqyn shetelderden kelgen 2 myńnan asa ǵalym men muǵalim qatysty. Sonymen qatar elimizdiń túkpir-túkpirinen kelgen eń úzdik muǵalimder de qatysyp, óz oılaryn ortaǵa saldy.
Halyqaralyq konferensııada sheteldik bedeldi sarapshylar men spıkerler qatysýshylarǵa arnaıy dáris oqydy. Atap aıtar bolsaq, Kembrıdj ýnıversıteti bilim fakýltetiniń dekany Sıýzan Robertson «HHI ǵasyr dáýirindegi jahandyq biliktilikterge ıe oqýshyǵa aınal: qıyndyqtar men faktiler», London ýnıversıtettik kolledji Bilim ınstıtýtynyń qurmetti professory, aty ańyzǵa aınalǵan pedagog-psıholog Shalva Amonashvılı «Mektepke deıingi bilim berýdegi gýmanıtarlyq pedagogıkanyń tájirıbesi», Gonkong ýnıversıtetiniń bilim salasy departamentiniń dırektory, qytaı bilim júıesindegi reformatorlardyń biri Kaı-Mıng Chen «Bilim men ǵylymnyń mańyzy týraly», EduCluster Finland – ınnovasııa jáne syrtqy baılanys dırektory, fındik bilim júıesiniń ınnovatory Devıd Marsh «CLIL mánmátininde oqytý men oqý qalaı ózgeredi?» jáne Massachýsets tehnologııa ınstıtýtynyń professory Tomas Haýs «Oqýshylarǵa negizgi hımııany qalaı jeńildetýge bolady?» taqyrybynda dáris oqyp, tájirıbelerimen bólisti.
Astanadaǵy konferensııa 12 baǵytta jumys istep, 50-den asa túrli is-shara ótti. Jıynda bilim júıesindegi ózgerister, muǵalimderdi oqytý, kásibı damytý jáne olardyń jan-jaqty órkendeýi, orta bilim berýdegi ınnovasııa men tendensııa jónindegi plenarlyq jáne seksııalyq otyrystar da uıymdastyryldy. Sonymen qatar ártúrli formattaǵy jumys, ıaǵnı baıandamalar, sheberlik saǵattary, prezentasııalar, dóńgelek ústelder, paneldik dıskýssııalar, semınarlar, poster-sessııalar men bilim resýrstarynyń kórmesi de uıymdastyryldy.
«Nazarbaev zııatkerlik mektepteri» derbes bilim berý uıymynyń basqarma tóraıymy Kúlásh Shámshıdınovanyń aıtýynsha, konferensııaǵa qatysýǵa ótinim bergenderdiń sany óte kóp bolǵandyqtan, eń úzdik degenderin tańdap alǵan. «Bıylǵy halyqaralyq konferensııanyń bir ereksheligi – myńnan asa ǵylymı baıandama kelip tústi. Osy baıandama boıynsha sarapshylyq top jumys istep, tańdap alynǵan 200 baıandama tyńdalymǵa jiberildi. Sondaı-aq elimizdiń jáne sheteldiń muǵalim, dırektorlary ózderiniń baıandamalarymen shyǵyp jatyr», deıdi K.Shámshıdınova.
Osymen segizinshi ret uıymdastyrylǵan eki kúndik konferensııa bilim salasynyń otandyq jáne ǵalamdyq eń ózekti máselelerin talqylaýǵa arnalǵan ǵylym álemindegi bedeldi alańǵa aınalyp úlgerdi.
Álı BITО́RE,
«Egemen Qazaqstan»
