Úsh kúnge sozylǵan shara barysynda joǵaryda atalǵan taqyryptar boıynsha tartymdy áńgimelerdiń tıegi aǵytylyp, kókeıkesti máseleler tóńireginde oı-pikirler aıtyldy. Ásirese balalar men jetkinshek urpaqty tárbıeleý, olardyń boıyna adamgershilik pen patrıottyq sezimdi sińirý, jas órenderdiń jeke tulǵa retinde qalyptasýyndaǵy ata-atanalar men muǵalimderdiń, pedagog-ustazdardyń atqaratyn róline erekshe mán berildi.
«Bóbek» qaıyrymdylyq qorynyń prezıdenti, «О́zin ózi taný» rýhanı-adamgershilik bilim berý baǵdarlamasynyń avtory Sara Nazarbaeva semınarǵa qatysýshylarǵa óziniń quttyqtaý hatyn joldady. Ol barlyq meımandarǵa zor alǵysyn bildirip, jetkinshek urpaqty tárbıeleý isinde olardyń atqaryp otyrǵan eńbekteri orasan zor ekenin atap ótti.
Semınarda Joǵary praktıkalyq psıhologııa mektebiniń dırektory, pedagogıka ǵylymdarynyń kandıdaty Alekseı Babaıans (Reseı), «Halyqaralyq izgilikti pedagogıka ortalyǵy» qoǵamdyq birlestikteri halyqaralyq qaýymdastyǵynyń vıse-prezıdenti Zarına Tarǵaqova (Qazaqstan), Joǵary praktıkalyq psıhologııa mektebiniń treneri Sergeı Avakov (Reseı), Halyqaralyq izgilikti pedagogıka ortalyǵynyń prezıdenti, psıhologııa ǵylymdarynyń doktory Paata Amonashvılı (Reseı) jáne basqa da ǵalymdar men mamandar dáris oqyp, sheberlik sabaǵyn ótkizdi.
Sondaı-aq osy sharaǵa Bilim jáne ǵylym mınıstri Erlan Saǵadıev, Parlament Májilisi Tóraǵasynyń orynbasary Gúlmıra Isımbaeva, «Nursultan Nazarbaev bilim qory» qoǵamdyq qorynyń dırektory Dınara Nazarbaeva, Qazaqstan musylmandary dinı basqarmasynyń tóraǵasy Serikbaı Oraz, Pravoslavııa dinı semınarııasynyń prorektory Ivan Lıvınskıı jáne basqa da belgili tulǵalar qatysty.
Semınar barysynda Halyqaralyq izgilikti pedagogıka ortalyǵynyń prezıdenti Paata Amonashvılı jáne qoǵam qaıratkerleri Baqytjan Sertekov pen Dáýren Muqanov «Bóbek» qaıyrymdylyq qorynyń prezıdenti Sara Nazarbaevaǵa «Rýh batyry» men «Uly Dala eli anasy» ordenderiniń tabys etiletini jaıynda málimdedi.
Ǵalym SÚLEIMEN,
«Egemen Qazaqstan»
ALMATY
