Kórermen nazaryna 300-den astam jádiger usynyldy. Olardyń arasynda kartınalar, ártisterdiń portretteri, túrli jyldardaǵy ańdatpalar, teatr týraly maqalalar jaryq kórgen jýrnaldar, kostıýmder men fotosýretter bar. Sonymen qatar kórmege kelýshiler madaqtamalar men teatr ashylǵanda tabystalǵan alǵashqy sımvolıkalyq kiltterdi tamashalaı alady.
– Teatr úshin 45 jyl – bútindeı bir dáýir. Osy ýaqyt aralyǵynda teatrda qanshama myqty tulǵalar eńbek etti. Biz olarmen birge jumys istegenimizdi maqtan tutamyz, – dedi mýzykalyq komedııa teatrynyń dırektory Amantaı Ybraev. – Sonymen qatar biz jańa esimderdi ashamyz. Jyl saıyn bizge kóptegen jas talanttar keledi. Jaqynda teatrda halyqaralyq operetta jáne mıýzıkl festıvali ashylady. Al 16 qarashada teatrymyz kórermendermen jáne jankúıerlermen birge óziniń 45 jyldyq mereıtoıyn atap ótedi.
Qaraǵandy akademııalyq mýzykalyq komedııa teatry óziniń birinshi teatr maýsymyn 1973 jyldyń 16 qarashasynda I.Dýnaevskııdiń «Volnyı veter» operettasymen ashqan. Teatr óz tarıhynda gastroldik saparmen Qyrǵyzstan, Reseı, Ýkraına, Belarýs, Tájikstan, Qytaı elderiniń 200-den astam qalasynda óner kórsetti. О́ner ujymynyń repertýarynan 280-nen astam qoıylym oryn alǵan. Onyń ishinde zamanaýı jáne álemdik klassıkalyq operettanyń jaýhar týyndylary bar.
Qaırat ÁBILDA,
«Egemen Qazaqstan»
QARAǴANDY
