Jumyssyz jáne ózin-ózi jumyspen qamtyp otyrǵan halyqty jappaı oqytý, kásipkerlik negizderine oqytý jáne jeńildetilgen shaǵyn kredıt berý arqyly kásipkerlik bastamalardy qoldaýǵa, eńbek utqyrlyǵyn arttyrýǵa baǵyttalǵan bul baǵdarlama 2017 jyldyń naýryz aıynan bastap iske asyrylýda. Bıyl baǵdarlamany iske asyrýǵa 2,8 mlrd.teńge qarastyrylǵan.
- Baǵdarlamaǵa sáıkes 1131 adamdy 15 uıymda oqytý kózdelip otyr. Bul, eń aldymen, UBT tapsyrmaǵan jáne oqý oryndaryna túspegen mektep túlekteri. Stýdentter tegin oqıdy, sonymen qatar stıpendııa tólenip, kúnine bir ret ystyq tamaq beriledi. Basqa qalalardan kelgenderge jol júrý jáne turý shyǵyndarǵa materıaldyq kómek kózdelgen. Sondaı-aq, kolledjde jáne oqý ortalyqtarynda 712 adam qysqa merzimdi kýrs oqydy. Oqý merzimi-eńbek naryǵynda suranysqa ıe mamandyqtar boıynsha 1 aıdan 6 aıǵa deıin. Oqýdan keıin 187 adam jumysqa ornalastyryldy, dedi Mańǵystaý oblysynyń jumyspen qamtýdy úılestirý jáne áleýmettik baǵdarlamalar basqarmasynyń basshysy Q.Berishbaev.
«Atameken» UKP Mańǵystaý oblysy boıynsha basshysy N. Qarasaev "Bastaý Bıznes" baǵdarlamasy boıynsha 880 adam oqytyldy jáne jalpy somasy 605,2 mln.teńgeni quraıtyn 192 joba júzege asyryldy dese, «Agroónerkásip keshenin damytý úshin 341 jobaǵa 1 244,89 mln. teńge bólindi, onyń ishinde 712 500 mln. tengeni quraıtyn 187 joba iske asyryldy, dedi oblystyń aýyl sharýashylyǵy basqarmasynyń basshysy S.Qaldyǵul.
Shaǵyn jáne orta bıznes salasynda 2017-2021 jyldarǵa arnalǵan "Eńbek" nátıjeli jumyspen qamtýdy jáne jappaı kásipkerlikti damytý baǵdarlamasyn iske asyrýdan kútiletin boljam - 543,3 mln.tengeni quraıtyn 37 joba, 103 jumys ornyn qurý. Aqtaý jáne Jańaózen qalalarynda shaǵyn nesıeleýge 543 263 myń teńge bólindi, bul 2017 jylǵa qaraǵanda 2,2 ese kóp dedi, Kásipkerlik jáne saýda basqarmasynyń basshysy V.Mustapaeva óz esebinde.
Jalpy, jyl basynan beri 26,6 myń jańa jumys orny ashylsa, onyń ishinde 85% turaqty negizde. Oblys boıynsha baǵdarlama aıasynda 19,1 myń adam, onyń 13,9 myńy turaqty jumys oryndaryna ornalastyrylǵan.
Elbasynyń jańa joldaýyn jáne Bes áleýmettik bastamany iske asyrý barysy týraly Ekonomıka jáne bıýdjettik josparlaý basqarmasynyń basshysy Marına Álbekova baıandady:
Halyqtyń tabys deńgeıin arttyrý tarmaǵy boıynsha búgingi kúni oblysta tabysy 42,5 myń teńgeden kem 39 889 qyzmetkerge tómen eńbekaqy tólenedi. Bıýdjettik uıymdarda jalaqysy tómen 24 251 qyzmetkerdiń jalaqysyn arttyrýǵa 2019 jylǵa arnalǵan respýblıkalyq bıýdjetten 3,2 mlrd.teńge kózdelgen. Sonymen qatar oblysta 50 kompanııa jalaqysy tómen qyzmetkerlerge jalaqy mólsherin arttyrýǵa daıyn ekendikterin málimdedi.
Sondaı-aq bilim berý sapasyn arttyrý máselesi boıynsha úsh aýysymdy mektepterdiń tizbesi pysyqtaldy. Basqudyq jáne Atameken aýyldaryndaǵy mektepterge árqaısysy 320 oryndyq 2 qosymsha qurylys salynatyn bolady. 2019 jyly Batyr aýylynda 960 oryndyq 1 mektep salý josparda bar. Sonymen qatar 2019-2020 oqý jylynan bastap 4, 9, 10 synyptarda Nazarbaev Zııatkerlik mektepteriniń oqytý júıesi men ádistemesin engizýdi qamtamasyz etý boıynsha jumystar júrgizilýde.
Gúlaıym ShYNTEMIRQYZY,
«Egemen Qazaqstan»
Mańǵystaý oblysy
