QR Ulttyq bankiniń málimetteri boıynsha, Qazaqstan ekonomıkasyna malaızııalyq tikeleı ınvestısııalardyń 2016-2017 jyldar ishindegi jáne 2018 jyldyń birinshi toqsanyndaǵy úlesi 16,6 mln AQSh dollaryn quraıdy. Negizgi ınvestısııa munaı-gaz, qurylys jáne ınfraqurylymǵa baǵyttalyp otyr.
Eki el arasyndaǵy taýar aınalymynyń qarqyny jaǵynan 2017 jyldyń osy kezeńimen salystyrǵanda, ózara saýda 48%-ǵa (38,9 mln. AQSh dollary) óskeni baıqalyp otyr. 2018 jyldyń qańtar - sáýir aılaryndaǵy qazaqstandyq ónim eksporty 251 myń AQSh dollaryn, al ımport 38,6 mln AQSh dollaryn qurady.
Forým jumysyna ekonomıkanyń túrli sektorlarynda (munaı-gaz salasy, metallýrgııa ónerkásibi, jeńil ónerkásip jáne t.b.) qyzmet etetin Malaızııanyń 40-tan asa kompanııasy, sondaı-aq, túrli ekonomıka sektorlarynda qyzmet etetin kommersııalyq jáne memlekettik 60-tan asa qazaqstandyq kompanııa qatysýda.
Forým aıasynda Qazaqstan-Malaızııa Iskerlik keńesi men «Atameken» UKP, Qazaqstan - Malaızııa Iskerlik keńesi men «Qazaqınvest», Qazaqstan - Malaızııa Iskerlik keńesi men «Qazaqeksport» arasynda ózara túsinistik jáne yntymaqtastyq týraly birqatar memorandýmdarǵa qol qoıyldy.
Forým saýda jáne ınvestısııa salasyndaǵy ózara árekettestik syndy keń taqyryptardy qozǵaıtyn plenarlyq sessııa jáne ashyq paneldik pikirtalas, V2V kezdesýleri formatynda ótip jatyr. Is-sharanyń basty spıkerleri – Malaızııadaǵy Qazaqstan elshisi Danııar Sárekenov, Qazaqstandaǵy Malaızııa elshisi Saıd Mohamad Bakrı bın Saıd Abdýl Rahman, «Resmi» kompanııalar toby dırektorlar keńesiniń tóraǵasy Qaırat Májibaev, Malaızııa-Qazaqstan Iskerlik keńesiniń ortaq tóraǵasy Datýk Lý Týk Djı (Datuk Loo Took Gee) syndy tulǵalar.
Aınash ESALI,
«Egemen Qazaqstan».
ALMATY
