Kelisimge 2017 jylǵy 9 qarashada Chelıabınsk qalasynda qol qoıylǵan bolatyn. Qujattyń maqsaty qazaqstandyq taraptyń («QazTransOıl» AQ) 141728 tonna mólsherindegi jáne reseılik taraptyń («Transneft – Ýral» AQ – «Transneft» JAQ-nyń enshiles qoǵamy) 62048 tonna mólsherindegi tehnologııalyq munaıǵa menshik ıesi quqyqtaryn rastaý bolyp tabylady.
Zań jobasy búgingi kúnde is júzinde bar munaıdyń atalǵan uıymdarǵa tıesiligin zańdy túrde bekitedi, al Kelisimde kórsetilgen keste munaıdy menshik ıelerine berý úshin qajetti azamattyq-quqyqtyq jáne uıymdyq rásimderdi jeńildetý men barynsha tómendetýge múmkindik beredi.
Qujat menshik quqyǵy munaıǵa ótken kezde salyqtyq mindettemelerden bosatýdy kózdeıdi. Beriletin munaıǵa ıelik quqyǵy Qazaqstan Respýblıkasyna qatysty korporatıvtik tabys salyǵyn (tólem kózinde ustalatyn salyqty qosa alǵanda) eseptegende kiris dep tanylmaıdy. Sondaı-aq, Qazaqstan men Reseıde janama salyqtardy (qosylǵan qun salyǵy men aksızdi) esepteý úshin ótkizý (ótkizý boıynsha aınalym) bolyp tabylmaıdy.
Munaıdy berý úderisi Qazaqstanda salyq salynatyn ımport dep tanylmaıdy jáne taraptar zańnamasynda belgilengen ózge de salyqtar, alymdar jáne basqa da mindetti tólemder alýǵa jatpaıdy.
