Úı satyp alýǵa arnalǵan zaımdar áskerı qyzmetshilerge 6-8% aralyǵyndaǵy jyldyq mólsherlememen arnaıy «áskerı ónim» baǵdarlamasy aıasynda berildi. Bul baǵdarlamany Turǵyn úı qurylys jınaq banki («Báıterek» holdınginiń enshiles uıymy) 2018 jyly áskerı qyzmetshilerdi qoldaý maqsatynda iske qosqan-dy. Alǵashqy zaem 2018 jyldyń 5 qyrkúıeginde resimdeldi.
Turǵyn úı qurylys jınaq bankiniń Otan qorǵaýshylarǵa usynyp otyrǵan jeńildetilgen zaımdary úsh túrge bólinedi. Al onyń sharttary úmitkerdiń jınaǵan qarajatynyń kólemi men tańdalǵan páterine baılanysty anyqtalady.
Qazir Turǵyn úı qurylys jınaq bankinde jalpy somasy 10,5 mlrd teńge kólemindegi taǵy 700 ótinish qarastyrylyp jatyr. Jyl sońyna deıin 6 000 áskerı qyzmetshini nesıelendirý josparlanǵan. Bul maqsatta bank óz qarajaty esebinen 74 mlrd teńge bóldi.
Turǵyn úı qurylys jınaq banki basqarma tóraıymy Lázzat Ibragımovanyń túsindirýinshe, bıyl pýlǵa ilige almaǵan áskerı qyzmetshiler Turǵyn úı qurylys jınaq bankindegi shottarynda aqsha jınaýdy ary qaraı jalǵastyra alady. Bul úshin bank barynsha jaıly jáne qaýipsiz jaǵdaı jasap otyr. Eń bastysy, áskerı qyzmetshilerdiń shottaryna erekshe mártebe jáne qol suǵylmaýshylyq kepili berilgen. Olardyń jınaǵan qarajaty bıýdjet esebine alynbaıdy. Olarǵa tyıym salýǵa bolmaıdy jáne ýaqtyly tólenbegen qandaı da bir ózge nesıe boıynsha ekinshi deńgeıli bankter tólem talaptaryn qoıa almaıdy. Sondaı-aq bul depozıtterdegi tıimdi jyldyq syıaqy mólsherlemesi 13,3%-ǵa deıin baratynyn aıta ketý kerek. Al Turǵyn úı qurylys jınaq banki arqyly nesıe alý kezinde tólem qabilettiligin rastaýdyń jeńildetilgen analızi qoldanylady. Iаǵnı baǵalaý barysynda otbasyǵa ketetin shyǵyndar men basqa ekinshi deńgeıli bankter aldyndaǵy mindettemeleri eskerilmeıdi.
Jalpy alǵanda jańa turǵyn úı baǵdarlamasynyń alǵashqy kezeńine qatysýǵa 13 myń áskerı qyzmetshi nıet bildirgen. Pýlǵa eń kóp upaı jınaǵan qatysýshylar kirdi. Upaı sanyna birinshi kezekte úmitkerdiń áskerı qyzmette ótkizgen jyldarynyń sany yqpal etti.
Qazaqstanda shamamen 70 myńdaı áskerı qyzmetshi turǵyn úı tólemderin alady. Bul – turǵyn úıge muqtaj áskerılerdiń sany. Turǵyn úı qurylys jınaq banki osy azamattardyń baspana máselesin aldaǵy 5-6 jyldyń ishinde sheshýge nıetti.
Aınash ESALI,
«Egemen Qazaqstan».
ALMATY
