Aqparat taratýǵa Q.A.Iаsaýı atyndaǵy HQTÝ-da oqıtyn túrki tildes elderdiń stýdentteri erikti túrde atsalyspaq. Túrkistan qalasynda ótken «Túrkistan: jańa aqparattyq keńistik» atty halyqaralyq medıa forýmda birneshe memlekettiń BAQ jetekshileri memorandýmǵa qol qoıdy. Iаǵnı osy qujat negizinde Túrkııa, Ázirbaıjan, О́zbekstan, Tatarstan jáne Qyrǵyzstan respýblıkalarynyń jetekshi aqparat quraldary men Túrkistan oblystyq ishki saıasat basqarmasy arasynda áriptestik ornatyldy.
Túrkistan oblystyq ishki saıasat basqarmasynyń basshysy Beısenbaı Tájibaev Túrkııanyń «TRT» telekompanııasynyń Astanadaǵy ókildiginiń dırektory Abdýlhamıt Avsharmen, Qyrǵyzstannyń «Kabar» ulttyq aqparat agenttiginiń IT departamentiniń dırektory Kalnýr Janybaevpen, Tatarstannyń «Tatar-ınform» aqparat agenttigi bas dırektorynyń orynbasary Ramıs Latıpovpen jáne Ázirbaıjannyń ITV teleradıokompanııasynyń Qazaqstandaǵy ókili Majıdı Fýzýlımen BAQ salasyndaǵy áriptestik jáne iskerlik baılanys ornatý jónindegi memorandýmǵa qol qoıdy.
Osy qujat negizinde túrki mádenıeti men rýhanııatyn, baýyrlas halyqtardyń birligin nyǵaıtý baǵytynda da aqparattyq qoldaý kórsetilmek. Taraptar aqparat almasý, ózara baılanysty damytý jolynda yntymaqpen áreket etýdi kózdep otyr. Jýrnalıstıka salasyndaǵy jańa tehnologııalardy meńgerý, tájirıbe almasý máselesine de kóńil bólinedi.
Memorandýmǵa qol qoıǵan sheteldik BAQ jetekshileri men ókilderi Túrkistannyń týrızm jáne Túrki áleminiń ortalyǵyna aınalatynyna senim bildirip, aqparattyq qoldaý kórsetýge daıyn ekenderin jetkizdi.
Ǵalymjan ELShIBAI,
«Egemen Qazaqstan»
Túrkistan qalasy
