Aldymen qyrkúıektiń sońǵy onkúndiginde Mańǵystaý oblysynda ornalasqan «Oımasha» polıgonynda «Batys-2018» iri aýqymdy strategııalyq komandalyq-shtabtyq oqý-jattyǵýlary ótti. Oqý-jattyǵý barysynda áskerlerdiń birikken toptamasy shól dalada shartty qarsylasty qorshap, el ishine enýine tosqaýyl bolyp, shabýyldaý arqyly «joıyp jiberdi».
Qarýly kúshterdiń quramalary men áskerı bólimderiniń «Batys-2018» strategııalyq komandalyq-shtabtyq oqý-jattyǵýyna Qarýly Kúshterdiń Bas shtabynyń bastyǵy, general-leıtenant Murat Maıkeev jetekshilik etti.
Oqý-jattyǵýdyń birinshi kezeńi barysynda «Ońtústik», «Shyǵys» óńirlik qolbasshylyqtary men Desanttyq-shabýyldaý áskerleriniń quramalary, áskerı bólimderi birneshe myńdaǵan shaqyrymǵa jaıaý marsh jasap, shtattyq qarý-jaraǵy jáne áskerı tehnıkasymen quramdastyrylǵan tásilmen Mańǵystaý oblysyna almastyryldy. Budan soń qysqa merzim ishinde aýmaqtyq ásker bólimsheleriniń jaýyngerlik úılesýi júrgizilip, óńirdegi mańyzdy nysandar, onyń ishinde, daǵdarys aýdanynda áskerlerdi túsirý stansalary kúzetke alyndy. Sonymen qatar «Batys» óńirlik qolbasshylyǵy basshysynyń jetekshiligimen óńirdegi turaqty jaǵdaıdy qalpyna keltirýi tıis áskerlerdiń túraralyq toptamasy quryldy.
Strategııalyq mańyzdy oqý-jattyǵýdyń ekinshi kezeńinde elimizdegi zańsyz qarýly qurylymdardyń is-áreketteri úlgi boıynsha josparlanyp, olarǵa qarsy arnaıy operasııalar júrgizildi. Qarýly kúshterdiń arnaıy operasııalar kúshteriniń bólimsheleri ótýi qıyn jáne tańsyq jerde tasalanyp, shaǵyn toptarmen almasa, búrkemelene otyryp, barlanǵan málimetterdi onlaın rejimde basqarý pýnktterine jiberip otyrdy. Izdestirý nátıjeleri boıynsha avıasııa men artıllerııanyń atysyn qoldaný týraly sheshim qabyldandy. Munyń barlyǵy qazirgi zamanǵy qarýly qaqtyǵystar tájirıbesin eskere otyryp, barynsha shynaıy túrde júrgizildi.
«Batys-2018» oqý-jattyǵýy sheńberinde tyldyq jáne tehnıkalyq qamtamasyz etýdiń kúshteri men quraldarynyń iri toptamasy qoldanyldy. Oqý-jattyǵýdyń barlyq kezeńi materıaldyq-tehnıkalyq jabdyqtarmen qamtamasyz etildi. Komendanttyq qyzmetti áskerı polısııa uıymdastyryp, al óńirdegi asa mańyzdy nysandardy Mańǵystaý oblysynyń aýmaqtyq qorǵanys brıgadasy kúzetti. Jattyǵýdyń sheshýshi kezeńinde brıgadalyq-taktıkalyq top qorǵanys pozısııalaryna ornyǵyp, el shetine zańsyz engen qarýly qurylymdardy qorshaýǵa alyp, sodan soń áýe, artıllerııa jáne jalpyáskerı bólimsheler atys pen shabýylǵa kóshe otyryp, shartty qarsylastyń kózin joıyp jiberdi.
Osylaısha, «Batys-2018» strategııalyq komandalyq-shtabtyq oqý-jattyǵýyna Qurlyq áskerleri, Áýe qorǵanysy kúshteri, Áskerı-teńiz kúshteri, Arnaıy operasııalar kúshteri, arnaıy áskerler jáne materıaldyq-tehnıkalyq qamtamasyz etý bólimderi men bólimsheleriniń shtattyq qarý-jaraǵy jáne áskerı tehnıkamen 5000-nan asa áskerı qyzmetshi jumyldyryldy. Al oqý-jattyǵýdyń arnaıy tapsyrmalaryn Ulttyq ulan men Ishki ister mınıstrligi, Tótenshe jaǵdaılar komıtetiniń bólimsheleri oryndady.
Qorǵanys mınıstrligi basshylarynyń baǵa berýi boıynsha oqý-jattyǵý sátti ótkizildi. Áskerler shól dala jaǵdaıynda batys óńirinde jaýyngerlik is-qımyldardy júrgizý tájirıbesin jınaqtap, dalalyq daǵdyǵa joǵary dárejede mashyqtanyp, qoıylǵan mindetti abyroımen atqaryp shyqty.
Venera TÚGELBAI,
«Egemen Qazaqstan»
