«Egemen Qazaqstan» gazeti Memleket basshysynyń tapsyrmasyn oryndaý maqsatynda Aqparat jáne kommýnıkasııalar mınıstrliginiń qoldaýymen osy baǵytta birqatar jobany júzege asyryp jatyr. Sonyń biri – qandastardyń qarasy mol elderdegi qazaqy BAQ ókilderin bas basylymda tájirıbeden ótkizý. Osy istiń aıasynda taǵylymdamadan ótýshilerdiń alǵashqy legi – Mońǵolııadaǵy «Jańa dáýir» gazetiniń tilshisi Qýat Ýatqan men «TV4» telearnasynyń tilshisi Shynarbek Jomart «Egemenge» keldi. Bul bastama elimizdiń Mońǵolııadaǵy Tótenshe jáne ókiletti elshisi Qalybek Qoblandınniń atsalysýymen jáne «Egemenniń» qarjylaı qoldaýymen júzege asyp otyr. Jýrnalıst qandastarymyz el gazetinde jınaǵan tájirıbelerin endi О́lgeıdegi qazaq basylymyn órkendetýge jumsaıtyn bolady.
«Atajurttaǵy eń iri basylymnan is-tájirıbeden ótý – men úshin úlken mártebe. «Egemen Qazaqstanda» qazaq jerindegi jańalyqtardan bastap, álemdik oqıǵalarǵa ulasqan saraptamalyq materıaldar molynan beriledi eken. Gazettiń shyǵarmashylyq, óndiristik úderisterin kózben kórip, úlgi alarlyq jaqtaryn kóńilge toqydyq. Aldaǵy jumystarymyzǵa osy tájirıbeni keńinen qoldanamyz», deıdi baıólkelik qandasymyz Qýat Ýatqan.
«Mońǵolııada qazaq tilinde aqparat taratatyn 1 radıo, 4 telearna, 2 gazet, 1 jýrnal, 2 veb-saıt bar. Bular Atajurttaǵy jańalyqtar men oqıǵalardy kúndelikti ınternet arqyly qarap, halyqqa usynady. Ol jaqtaǵy qazaqtar Qazaqstannyń aqparat aıdynyn únemi baqylap otyrady.
Qandastarǵa barynsha qamqorlyq kórsetip otyrǵan Elbasyna rızashylyǵymyz zor. Qazir aqparattyq shekaralar joıyldy. Álemde ne bolyp jatqanyn taý qoınaýyndaǵy adam da bilip otyrady. Al jumys isteý tásilderi ártúrli. El gazetine kelip, qazaq jýrnalıstıkasynyń aýasyn jutý – bizdiń de tynysymyzdy ashty. Endi sol ekinshi tynysymyzben Mońǵolııadaǵy qazaq basylymdaryna qyzmet etemiz», dedi taǵy bir baýyrymyz Shynarbek Jomart.
Qazirgi kúni «Egemen» shettegi aǵaıynnyń atajurtpen baılanysyn keńeıte túsetin bastamany qandastar kóptep qonystanǵan basqa da irgeles elder baǵytynda jalǵastyrýda. Ulttyq baspasóz tarıhynda tuńǵysh ret «Egemen Qazaqstan» Reseı aýmaǵynda gazet taratýǵa lısenzııa alǵanyn da aıta keteıik. Sol sııaqty bul jumystar Qyrǵyz, Mońǵolııa elderinde de jalǵasýda.
Baǵashar TURSYNBAIULY,
«Egemen Qazaqstan»
