Búgin, 5 qarashada, Atyraý qalasynyń ákimi Alımuhammed Quttumuratuly apparat jınalysy barysynda qaramaǵyndaǵylarǵa qurylys bastaý úshin «eski qala» aýmaǵynda ornalasqan úılerdi súrý jumystaryn jedeldetýdi tapsyrdy.
- Aldaǵy jyldyń naýryz aıynan bastap áleýmettik nysandar salý úshin bul aýmaqty bosatýymyz kerek. Sol úshin turǵyndarmen kezdesip, ótemaqy tóleý sharttaryn túsindirý, ótemaqy somasyna kelispegen turǵyndardy kóshirý jumystaryn kúsheıtý qajet, - dedi qala basshysy.
Aıta ketsek, «eski qala» aýmaǵynda súrilýi tıis aýdany 18 ga 269 úı bar. Qazir sonyń 223-i táýelsiz baǵalaýdan ótti, 73 úıdiń turǵyndaryna jańa úı alý úshin ótemaqy tólendi. Kóshirýge kelisken úı turǵyndary 2019 jyldyń basynda jańadan salynyp jatqan Bereke yqshamaýdanynan baspanaly bolady.
Eske sala ketsek, Atyraýdyń damý bas jospary boıynsha 2030 jylǵa qaraı qala turǵyndarynyń sany 350 myń adamǵa deıin ósedi dep kútilýde, al oblys ortalyǵynyń aýdany 3 esege ulǵaıyp, 46 myń ga bolmaq.
Áleýmettik ınfraqurylymnyń qalypty bolýy úshin 2030 jylǵa qaraı qosymsha 83 balabaqsha, 45 mektep, 20 emhana, 5 aýrýhana, 6 dene shynyqtyrý-saýyqtyrý kesheni jáne 3 mádenıet úıi salynady.
