Qazaqstannyń joǵary, kásiptik oqý oryndarynyń basshylary, Almaty qalasy Bilim basqarmasynyń, «Nazarbaev Zııatkerlik mektebiniń» jáne Y. Altynsarın atyndaǵy Ulttyq bilim akademııasynyń ókilderi qatysqan jıyn barysynda Ashat Aımaǵambetov Nazarbaev Zııatkerlik mektepteriniń qoldanystaǵy ádistemesi jalpy bilim berý júıesiniń negizi retinde qabyldanatyndyǵyn atap ótti. Sonymen qatar, ekonomıkadaǵy suranysqa ıe mamandyqtardy eskere otyryp, orta mektepterdegi balalarǵa kásiptik baǵdar berýdiń mańyzdylyǵyna erekshe mán berdi.
«Nazarbaev Zııatkerlik mektepteri» DBU Basqarma tóraıymy Kúlásh Shámshıdınova «Zamanaýı muǵalim: mektep pen joǵary oqý oryndarynyń baılanysy» taqyrybynda baıandama jasap, mektepterdegi bilim berýdi jańǵyrtý, pedagog kadrlardy daıarlaý, oqý úrdisin durys uıymdastyrý máseleleri, tájirıbelik sabaqtardyń, oqytý ádisteri men tehnologııalardyń, bilim men tehnologııany júıeleýdiń mańyzdylyǵyna toqtaldy. Muǵalim mekteptegi basty tulǵa. Bolashaq mamannyń tabysqa jetýinde bilikti pedagogtyń róli joǵary. Búginde mektepter joǵary oqý oryndaryna qaraǵanda zamanaýı zerthanalyq quraldarmen jabdyqtalǵan. Materıaldyq baza kómegimen muǵalimniń tájirıbelik sabaqtardy uıymdastyrýyna múmkindigi mol. Pedagogıkalyq qyzmettiń joǵary standarttary bilim salasyndaǵy qyzmetkerlerdiń biliktiligin turaqty arttyrýdy qajet etedi.
Y. Altynsarın atyndaǵy UBA vıse-prezıdenti Almagúl Muhamedhanova óz baıandamasynda oqý oryndarynyń jańartylǵan baǵdarlamasynyń alǵashqy taldaýlarynyń nátıjelerinde kezdesken máselelerge nazar aýdarý kerektigin aıtty. Túlekterdiń jańartylǵan baǵdarlamadaǵy oqý nátıjeleri men quzyrettiligi orta mektepte oqytýdyń jańa formasyna sáıkes kelmeıdi ári modýlder men pánderdiń taqyryptary eskirgen. Osy oraıda Qazaqstannyń barlyq óńirlerindegi joǵary oqý oryndaryndaǵy jańartylǵan baǵdarlamalar barysyna toqtalǵan Almagúl Muhamedhanova zerttelgen baǵdarlamalardan mańyzdy ról atqara alatyn qujattardyń tabylmaǵandyǵyn aıtty.
Almaty qalasyndaǵy Bilim berý basqarmasynyń bastyǵy Gúlnar Hodjabergenova baǵdarlama boıynsha kásibı-baǵyttalǵan bilim berýdi engizý týraly aqparat berip, pedagogıkalyq kadrlardyń jetispeýshiligine toqtaldy. Qazaqstannyń Bilim berý alıansynyń boljamyna sáıkes, 5 jylda Qazaqstandaǵy mektep oqýshylarynyń sany 3,5 mıllıonǵa, sáıkesinshe, muǵalimder men mekteptiń júktemesi 30 paıyzǵa artyp otyrady. Sondyqtan da osyndaı máselelerge de basa nazar aýdarǵan jón.
QR BǴM Joǵary jáne joǵary oqý ornynan keıingi bilim departamentiniń dırektory Ádilet Toıbaev «Pedagogıkalyq bilimdi modernızasııalaýǵa arnalǵan Jol kartasyndaǵy ındıkatıvtik kórsetkishter» taqyrybynda baıandama jasap, saladaǵy ózekti máselelerge toqtaldy. Al Abaı atyndaǵy QazUPÝ rektory Takır Balyqbaev joǵary oqý oryndaryndaǵy bilim berý úderisin jańǵyrtý, pedagogtardyń kásibı deńgeıin arttyrý, muǵalimderdiń qyzmettik saýattylyǵyn kóterýge qatysty pikirimen bólisip, bilim berý júıesiniń jetildirýdiń mańyzdylyǵyn atap ótti.
Konferensııany qorytyndylaı kele Bilim jáne ǵylym vıse-mınıstri Ashat Aımaǵambetov bilim berý salasynda anyqtalǵan kemshilikterdi joıý úshin pedagogıkalyq kadrlardy tıisti júıede daıarlaý jóninde qajetti sharalar qabyldanatynyn aıtty. Sondaı-aq, árbir pedagogıkalyq joǵary oqý orny túlekteriniń, mektep muǵalimderiniń biliktiligin, sonymen qatar sıfrlyq saýattylyqtaryn baǵalaý úshin sertıfıkattaýdan ótetin bolady. Sonymen qatar túlekterdiń jumysqa ornalasý deńgeıi tómen joǵary oqý oryndaryna qatań sharalar qoldanyp, ýnıversıtetterden lısenzııalary qaıtaryp alynatyn bolady. Al pedagogıkalyq mamandyqqa túsetin talapkerler úshin shekti ball kóbeıtiledi.
Elvıra Serikqyzy,
«Egemen Qazaqstan»
ALMATY
