Vedomstvo tarapy bıznes pen memlekettik organdardyń jumysyn jeńildetýdiń birneshe jolyn qarastyryp otyr. Buǵan deıin adam resýrstary men ýaqytty talap etken jumystardy endi sıfrlyq tehnologııalar atqarmaq. «Sıfrlyq Qazaqstan» memlekettik baǵdarlamasynyń negizgi baǵyttaryn iske asyrý boıynsha Qarjy mınıstrligi birqatar baǵytqa basymdyq berip otyr.
Eń aldymen, bıýdjetti josparlaý sapasyn arttyrý josparlanǵan. Buǵan deıin osy jumysty oryndaýǵa kem degende eki aı ýaqyt ketetin. Qazir bul merzimdi 20 jumys kúnine deıin qysqartýdy qolǵa alynǵan. Transformasııalaý esebinen memlekettik organdardyń shyǵyndary da azaıady.
Sondaı-aq memlekettik satyp alýlar júıesiniń ózge de quzyrly organdarmen birlese áreket etýi esebinen rastaý qujattary júıeli júrgiziledi. Qanatqaqty joba qarjy mınıstrliginde jyl sońyna deıin júzege asady. Kelesi jyldan bastap ózge mekemelerde iske qosylmaq. Bul elektrondy memlekettik satyp alý kezinde formatty-logıkalyq baqylaý turǵysynda qoldanýshylar jiberetin qatelikterdi 10 esege deıin, kameralyq baqylaý esebinen prosedýralyq buzýshylyqtardy 3 esege azaıtady. Elektrondy kelisimder men aktiler bir kelisimnen 10 myń teńge únemdeýge múmkindik beredi. Nátıjesinde bıznes ókilderi únemdeıtin qarjy 10 mıllıard teńgeni quramaq.
Sıfrlyq transformasııa derbes shottar salasyn da qamtydy. Buǵan deıin azamattar bereshekteri bar-joǵyn rastaıtyn anyqtamany 3 kún kútetin edi. 2015 jyly qyzmetterdi ortalyqtandyrý jumystary júrgizilip, mundaı anyqtamalar bir-eki sekýndta beriledi.
Qarjy mınıstrligi taýar qozǵalysyn baqylaý isine de erekshe den qoıyp keledi. Onlaın kassalyq baqylaý mashınalarynyń mańyzy zor. Qazirgi kezde saýdamen aınalysatyn salyq tóleýshilerdiń tek 9 paıyzynyń ǵana POS-termınaldary bar. 2020 jylǵa deıin bul kórsetkishti 100 paıyzǵa deıin jetkizý kózdelgen. Ol úshin kásipkerlerdiń barlyǵy onlaın-rejımde málimet taratatyn kassalyq baqylaý mashınalaryn ornatýlary tıis.
