Klýbtyń bolashaǵy úshin salynbaq ınvestısııa kólemi 1 mıllıard teńgege jýyqtaıdy. Atyraý oblysynyń ákimi Serik Shápkenov ınvestormen kezdesý barysynda bul qadamnyń mańyzdylyǵyna toqtaldy.
«Búgin biz óńirlik sportty damytýdaǵy mańyzdy bir kezeńdi qorytyndylap otyrmyz. «Atyraý» fýtbol klýby Memleket basshysy Qasym-Jomart Kemeluly Toqaevtyń kásibı sportqa jeke ınvestısııa tartý týraly tikeleı tapsyrmasy negizinde resmı túrde kommersııalyq negizde jumys isteýge kóshti. Bul sheshim – basqarýdyń jańa modeline jasalǵan qadam. «Atyraý» FK – munaıly astananyń maqtanyshy jáne solaı bolyp qala bermek. Jeke kapıtaldyń kelýi klýbtyń damýyna jańa serpin berip, adal jankúıerlerdiń súıispenshiligi men senimin saqtaı otyryp, ony básekege qabiletti eterine senimdimiz», dedi Serik Shápkenov.
Jańa basshylyq klýbty jaı ǵana bıznes emes, áleýmettik jaýapkershilik dep sanaıdy. Aldaǵy úsh jylda klýb akademııasyndaǵy shákirtter sanyn 1 000 balaǵa deıin arttyrý josparlanǵan. Sondaı-aq fýtbol ortalyǵynyń fılıaldary oblystyń barlyq aýdandarynda ashylmaq.
Klýbtyń damý strategııasynda talantty balalardy qoldaý basty orynǵa ıe. Jańa basshylyq júıeli seleksııalyq jumystar arqyly qabiletti jasóspirimderdi irikteýge múddeli. Eń bastysy – komandanyń negizgi quramy aldaǵy ýaqytta jergilikti jáne otandyq fýtbol mektebiniń túlekterinen jasaqtalady dep kútiledi.
Jekeshelendirý shartynyń mańyzdy tarmaqtarynyń biri – áıelder fýtbolyn damytý. Endi «Atyraý» fýtbol klýbynyń quramynda kásibı áıelder komandasy paıda bolady. Olar Qazaqstan Respýblıkasynyń birinshiliginde turaqty túrde óner kórsetip, óńir namysyn qorǵaıtyn bolady.
Investordyń jeke qarajaty esebinen Atyraýda zamanaýı fýtbol akademııasy boı kóteredi. Bul tek jattyǵý alańy emes, sportshylarǵa arnalǵan jataqhanasy men barlyq qajetti jaǵdaıy jasalǵan tolyqqandy sporttyq keshen bolmaq.
Buǵan deıin «Qaısardyń» ınvestory – «TAU Group Ltd» ókili Islamǵalı Qozbaqov, «Qyzyljardyń» jańa ıesi – kásipker Sergeı Kan, «Jeńis» klýbynyń ınvestory – kásipker Mıhaıl Lomtadze bolǵany málim boldy.
