Keshte aldymen Qaısar Álim týraly arnaıy jasalǵan derekti fılm kórsetildi. Odan keıin Qostanaı oblysy Mádenıet basqarmasynyń basshysy Erlan Qalmaqov qalamgerdi quttyqtap, oǵan shapan japty. Sonymen qatar Arqalyq qalasy, Amangeldi, Jankeldın aýdandary ákimshilikteriniń ókilderi týǵan jerdiń sálemin jetkizdi.
Osy keshke arnaıy kelgen belgili aqyn Qorǵanbek Amanjol Qaısar Álimniń shyǵarmalaryna arnaıy toqtaldy.
«Mirjaqyptyń súıegin alyp kelýi, Keıki batyrdyń bas súıegin ákelýge qatysýy sııaqty qoǵamdyq-azamattyq isterdi atqara júrip, ony móldirete jazyp, oqyrmanǵa kórkem tilmen jetkizýin, basqa pýblısıstıkalyq shyǵarmalaryn bylaı qoıǵanda, Ázilhan Nurshaıyqovpen 34 jyl udaıy hat jazysýy úlken eńbek, qazaq ádebıetinde epıstolıarlyq janrdy Qaısekeń ákeldi deýge negiz salady» dedi Qorǵanbek Amanjol.
Munan keıin sóz alǵan Qaısar Álimniń qostanaılyq áriptesteri, jerlesteri aqyn Jolbarys Baıazıd, jazýshy Ǵumar Ahmetchın jáne taǵy basqalar onyń pýblısıstıkasy men jýrnalıstıkanyń eńbektorysy jazǵan mańyzy joǵalmaıtyn shyǵarmalarǵa baǵa berdi. Keshti oblystyq fılarmonııanyń ánshileri Manapbek Qádirov pen Talǵat Moldaǵalıev ánmen órnektep otyrdy. I.Omarov atyndaǵy qazaq drama teatrynyń ártisteri Qaısar Álim shyǵarmalarynan úzindiler oryndady.
Kesh sońynda qalamgerdiń ózi týǵan jerdiń aýasyn jutyp, jerlesterimen qaýyshqanyna, ózin qalamger retinde qanattandyrǵan Qostanaıǵa kelip, mereıtoıyna oraı oqyrmandarymen kezdeskenine rızashylyǵyn bildirdi. Qazaqqa iri aqyndar men ǵalymdardy bergen qutty jer – Qyzbeli týraly tebirene sóıledi.
«Azdy-kópti eńbegiń, ózińdi qadirleý, adamdardy syılaý sııaqty jaqsylyqtyń barlyǵy da aldyńnan shyǵady eken. Rýhanı jańǵyrý aıasynda ótip jatqan bul esep berýime, jerlesterimdi kórgenime qýanamyn. Týǵan jer degende aldymen Qyzbeldi aıtamyn. Qostanaıda qansha aýyl bar, sonyń birindeı ǵana kishkene meniń Qyzbelimnen Alashtyń qanshama arystary túlep ushqan. Mirjaqyp Dýlatov, Seıdázim Qadyrbaev, Álmaǵambet Qasymov, Asqar Zakarın, álemge belgili akademıkter Fazylhan Báıimbetov, Saılaý, Sábıt Baızaqovtar – meniń aýylymnyń máńgi maqtanyshtary! Men Qostanaı óńirinde bolyp jatqan jańarý, rýhanı jańǵyrýlarǵa, oblys ákimi Arhımed Muhambetovtyń basshylyǵymen sońǵy jyldary júzege asyp jatqan ekonomıkalyq tabystarǵa qýanamyn. Sizdermen qaýyshý qalamger úshin baqyt, sony men de sezinip turmyn» dedi Qaısar Álim jerlesterine.
Keshte oblystyq ámbebap kitaphana jýrnalıst-jazýshy shyǵarmalaryna arnalǵan kórme uıymdastyrdy, Qaısar Álim shyǵarmalarynyń kórsetkishin qalamgerge tabys etti. Qaısar Álim de kitaphanaǵa óz kitaptaryn syılady.
Názıra Járimbet,
«Egemen Qazaqstan»
Qostanaı
