Bıylǵy jylǵy baıqaý Qazaqstannyń Tuńǵysh Prezıdenti – Elbasy Qorynyń «JasStar» shyǵarmashylyqpen aınalysatyn Halyqaralyq jastar festıvali aıasynda uıymdastyryldy. Qazaqstannyń ónerli jastary úshin mańyzdy bolyp sanalatyn baıqaýdyń ashylý saltanaty kolledjdiń jańadan paıdalanýǵa berilgen Ermek Serkebaev atyndaǵy zalynda ótti. KSRO Halyq ártisi Asanáli Áshimov jastarǵa aq batasyn berip, Qazaqstannyń halyq ártisteri Nurǵalı Núsipjanov, Naǵıma Esqalıeva, Qazaqstannyń eńbek sińirgen óner qaıratkeri Jámılá Serkebaeva baıqaýdyń qurmetti qonaqtary retinde qatysty.
Konsertte belgili dombyrashy Asylbek Eńsepov, «Samuryq» bı ansambli, án bóliminiń stýdenttik hory, qobyzshylar ansambli, kúı kvarteti óner kórsetip, zamanaýı ádispen batyl óńdelgen belgili án men kúılerdi sheberlikpen oryndap shyqty.
– «Kóshpendiler áýeni» baıqaýy talantty jas oryndaýshylardy ortaq shyǵarmashylyq maqsatqa biriktire alýymen órkendep keledi,– dedi kolledj dırektory, Qazaqstannyń eńbek sińirgen qaıratkeri Birjan Hasanǵalıev.– Bul baıqaý mýzykamyzdaǵy ulttyq dástúrdi damytyp qana qoımaı, jas talanttardyń qoǵamdyq keń aýqymda tanylýyna, qanatynyń qataıýyna serpin beredi. Sondyqtan da biz júldegerlerge beriletin barlyq atalymdardy «Qurmanǵazy», «Qorqyt», «Muhıt» dep ataýdy jón kórdik, qazaq dalasynyń eń uly mýzykanttary atyndaǵy júldeler jeńimpazdardy sózsiz qanattandyra túsedi. Qazylar alqasyna da belgili mýzykanttar men pedagogtardy tańdadyq. Belgili mýzyka zertteýshisi, kúıshi Abdýlhamıt Raıymbergenov, Qazaqstannyń eńbek sińirgen ártisi, professor Merýert Qalenbaeva, Qazaqstannyń eńbek sińirgen qaıratkeri, professor Aıgúl Qosanova jas talanttardyń ónerine qazylyq jasady.
Baıqaýdyń Erejesi men talabyna sáıkes, óner básekesinde anyqtalǵan eń myqty jas oryndaýshylardyń ustazdarynyń esimi de eskerýsiz qalmaı, jeńimpaz bolǵan laýreattyń nemese dıplomanttyń qarjylaı júldesiniń jartysy ony baptaǵan ustazyna da tıesili bolýy kózdeldi. «Kóshpendiler áýeni» baıqaýyn uıymdastyrý komıteti osyndaı tásil arqyly muǵalim mártebesin kóterý týraly Prezıdent N.Nazarbaevtyń qazan aıyndaǵy Joldaýyn is júzinde dáleldeýdi jón kórdi. Baıqaý qortyndysy boıynsha, dombyrashylar arasynda P.Chaıkovskıı atyndaǵy Almaty mýzyka kolledjiniń stýdenti Erjanat Jarqynnur úzdik dep tanylyp, Gran-prıdi ıelendi. Onyń 300 000 júldesi ekige bólinip, 150 000 teńgesin ustazy Saıat Aqbasov ıelendi.
Sáıkesinshe, barlyq júlde jeńimpazdar men pedagogtarǵa teń tıesili boldy. Ánshiler arasyndaǵy «Muhıt» júldesi J.Elebekov atyndaǵy Estrada jáne sırk kolledjiniń stýdenti Baıan Jubanovaǵa (pedagog Rysty Súleımenova), qobyzshylarǵa berilgen «Qorqyt» júldesi Almaty mýzykalyq kolledjiniń stýdenti Aıda Beknazarovaǵa (Laýla Chenemısova) tabystaldy. Ásel Qalekeshovanyń sheberlik synybynda oqıtyn Atyraý mýzykalyq kolledjiniń stýdenti Nuraısulý Talǵatova tehnıkalyq jaǵynan shyńdalǵan úzdik oryndaýshy retinde tanyldy. Márege jetken 42 úzdik oryndaýshy men pedagog ártúrli júldelerge ıe boldy. «Kóshpendiler áýeni» respýblıkalyq baıqaýyna tórelik jasaǵan qazylar alqasy bıylǵy qatysýshylardyń deńgeıiniń joǵary ekenin atap ótip, keleshekte qazaq óneri talaby da, talanty da bıik jańa esimdermen tolyǵa túsetinine senim bildirdi.
Aıgúl AHANBAIQYZY,
ALMATY
