Iý.Ilınniń málimdeýinshe, jol-paıdalaný qyzmetteri 1 myńnan astam ınjenerlik jáne qar tazalaý tehnıkasyn saılap qoıǵan. Sonymen qatar 120 myń tekshe metr kóktaıǵaqqa qarsy materıal jáne 12 myń tonnadan astam tuz ázirlengen. Qazirgi ýaqytta 37 myń metrden astam qardan qorǵaıtyn qalqandardy ornatý júzege asyrylýda. Al qys mezgilinde paıdalanylyp kelgen 950 jylytý beketine qosymsha taǵy 130-y qosylady.
Bir ókinishtisi, kún sýytqaly beri maýsymdyq tótenshe oqıǵalar da tirkele bastapty.
– Jylytý maýsymy bastalǵaly, ıaǵnı 15 qazan men 13 qarasha aralyǵynda respýblıkanyń turǵyn sektorynda 720-ǵa jýyq órt oryn aldy, olardyń saldarynan 27 adam kóz jumdy. Al ýly gazben ýlaný saldarynan 10 adam baqılyq boldy. Tabıǵı gazdan ýlanǵan 11 adam qaza tapty, – dedi Iý. Ilın.
Jalpy turǵyn sektorda órttiń oryn alýynyń negizgi sebepteriniń biri retinde halyqtyń turmysta órt qaýipsizdigi erejeleriniń qarapaıym talaptaryn saqtamaýy ataldy.
– Búginge deıin órt qaýipsizdigi aılyǵy uıymdastyrylyp, onyń aıasynda TJK aýmaqtyq bólimsheleriniń qyzmetkerleri 180 myń turǵyn úıdi aralap shyqty. 375 myńnan astam adamǵa nusqaýlyqtar taratyldy. 25 myńnan astam adamdy qamtı otyryp halyqpen 1 500 shara uıymdastyryldy, – dep málimdedi Iý.Ilın.
Sonymen qatar órt bolǵan jaǵdaıdaǵy is-áreketterdi pysyqtaý úshin muǵalimder men oqýshylardy oqý oryndarynyń ǵımarattarynan qaýipsiz evakýasııalaý boıynsha 800-den astam tájirıbelik jattyǵýlar ótkizilgen.
Baspasóz máslıhatynda Iý.Ilın 2017-2018 jylǵy qysta qarly boran men shyńyltyr aıazdyń saldarynan respýblıkalyq avtojoldardyń 120 ret jabylǵandyǵyn da atap ótti. Sondaı-aq kúrejoldardyń boıynda 23 myń adamǵa kómek kórsetilgen.
Ishki ister mınıstriniń orynbasary elimizdiń taýly-jotaly óńirlerinde 550-den asa sel oshaǵynyń anyqtalǵandyǵyna toqtaldy. Osyǵan oraı, «Qazseldenqorǵaý» mekemesi kúsheıtilgen daıyndyq rejimine kóshirilgen. Qaýiptiń aldyn alý maqsatynda selden qorǵaý qalqandary ornatylyp, aqparattyq saqtandyrý turǵydaǵy taqtaıshalar ilingen.
Sóz arasynda Iý.Ilın qys mezgilinde turǵyndardan, jolaýshylardan da saqtyq pen qaýipsizdiktiń qarapaıym qaǵıdattarynyń saqtalýy talap etiletindigin eske saldy.
Serik ÁBDIBEK,
«Egemen Qazaqstan»
