«Portaldyń negizgi maqsaty – qazaqstandyq jáne sheteldik kásipkerlerdi oblystyń ınvestısııalyq múmkindikterimen tanystyrý jáne osy óńirde óz bıznesin júrgizýine kómektesý» deıdi resýrsty uıymdastyrýshylar. Portal óńirdegi iskerlik ahýal, ınvestısııalyq jobalar, kásipkerlerdi memlekettik qoldaý sharalary jáne aýdandardyń ınfraqurylymdyq erekshelikteri týraly aqparat berip, basym sektorlardyń damýyna sholý jasaıdy. Saıttyń quryltaıshysy – Batys Qazaqstan oblysynyń kásipkerlik jáne ındýstrııalyq-ınnovasııalyq damý basqarmasy.
Jańa portal úsh tilde – qazaqsha, oryssha, jáne aǵylshynsha qyzmet kórsetedi. Saıtqa kirýshiler portaldyń «Aımaq týraly» bóliminen óńirdiń ózindik erekshelikteri, ınvestısııalyq áleýetinen bastap, oblys ortalyǵynda toqtaıtyn qonaqúıler, turmystyq jáne demalys oryndary týraly barlyq aqparatty taba alady. «Indýstrııalyq aımaq» bólimi óńirde qolǵa alynǵan jáne josparlanǵan jobalar týraly málimet berse, «Investor jol silteýishi» bóliminde yqtımal ınvestordyń ár qadamyna nusqaýlyqtar berilgen. Osy arqyly portaldan qazaqstandyq jáne sheteldik ınvestor ózine qajetti aqparatty, oblystyń áleýmettik-ekonomıkalyq áleýeti, damý kórsetkishteri, memlekettik qoldaý tetikteri, iske asyrylyp jatqan ınnovasııalyq jobalar, damý ınstıtýttary týraly málimetterdi «bir tereze» qaǵıdaty boıynsha op-ońaı taba alady.
– Bul portal ınvestorlarǵa servıstik qyzmet kórsetedi. Buryn ınvestorlarǵa qajetti aqparat oblys ákimdiginiń, «Oral» áleýmettik kásipkerlik korporasııasynyń jáne ózge de qurylymdardyń saıttarynda bólek-bólek ornalasqan bolsa, endi sonyń barlyǵy bir jerde toqaılasyp, ózara kirikken deýge bolady. Basqa jaqtan kelgen ınvestor osy saıttan ózine qajetti ınvestısııalyq ahýal, ınfraqurylymdar, kommersııalyq bos jer ýchaskeleri, qurylyp jatqan ındýstrııalyq aımaq, elimizdiń zańdylyqtary týraly barlyq aqparatty, kásiporyndy qalaı quryp, qalaı tirkeý kerektigi týraly naqty keńesti taba alady. Sondaı-aq ınvestorlar portaldyń vırtýaldy qabyldaý bólmesine óz pikirin jazyp qaldyryp, oǵan jaýap ala alady, – deıdi oblystyq kásipkerlik jáne ındýstrııalyq-ınnovasııalyq damý basqarmasy basshysynyń orynbasary Hasen Toıasov.
Portaldyń ınteraktıvti kartasynda 30-dan astam ınvestısııalyq joba, óndiristik jáne áleýmettik-ekonomıkalyq aımaqtar týraly málimet berilgen. Kartada sondaı-aq kólik, áleýmettik, energetıkalyq jáne mýnısıpaldy ınfraqurylym nysandary, jer, mıneraldy shógindiler, balyqsharýashylyǵy sý qoımalary jáne t.b.týraly málimetter, ónerkásiptik kásiporyndar týraly aqparat bar. «Portal iskerlik jáne memlekettik qarym-qatynas úshin tıimdi alań bola alady dep úmittenemiz» deıdi resýrsty uıymdastyrýshylar.
Qazbek QUTTYMURATULY,
«Egemen Qazaqstan»
Batys Qazaqstan oblysy
