Kartınaǵa áıelderinen ajyrasýǵa bel býǵan tórt dostyń basynan ótken shytyrman oqıǵalary arqaý bolady. Ajyramas dostar osyndaıda birge júrsek, otbasylyq kıkiljińdi umytyp, qalaǵanymyzsha rahattanyp ómir súremiz dep oılaǵan edi. Áıtkenmen, bul joly bári olar oılaǵandaı bolmaı shyqty.
Jańa komedııanyń bas prodıýserleri Qaırat Reımov pen Baǵdat Qojahmetov. Basty rólderde Sábıt Rahımbaev, Daýt Shaıhıslamov, Azım Saıdbaev, Darıǵa Badykova, Nurdáýlet Shertim, Natalıa Valkova, Darıa Aleksandrova, Nurgúl Alpysbaeva oınady. Al jobanyń rejısseri ári ssenarııdiń qosalqy avtory Anvar Matjanov da fılmde rólden tys qalmaǵan.
Sonymen Qaırat Reımov pen Baǵdat Qojahmetovtiń tyrnaqaldy prodıýserligin baǵalap, qoldaý kórsetý úshin alǵashqy kórsetilimge kıno men shoý-bıznestiń ókilderi jınaldy. Olardyń arasynda Sáken Maıǵazıev, Aqan Sataev, Aınur Ilııasova, Táýekel Músilim, Farhat Ábdiraıymov, Darıa Aleksandrova, Álisher Elikbaev syndy jandar bar.
«Komedııalyq fılm qyzyqty jaǵdaıattar arqyly otbasylyq qundylyqtardy dáriptep, kúıbeń tirlik pen otbasylyq ómirdiń basqa da qıyndyqtaryn jeńil qabyldaýǵa shaqyrady. Sonymen birge, «Gýdbaı, moı baı» fılmi qazirgi qoǵamdaǵy áleýmettik mańyzy bar basty máselelerdi kóteredi», – deıdi komedııalyq fılmniń basty rólin somdaýshylardyń biri Sábıt Rahımbaev.
Bir sózben aıtqanda, avtorlary fılmniń tabysty bolatynyna senimdi. Sebebi, qazaqstandyq kınoprokatqa jańadan qosylǵan bul týyndy buǵan deıin «31 arnada» úlken suranysqa ıe bolǵan «Jenatıkı» telehıkaıasynyń jelisimen túsirilgen.
«Men úshin «Gýdbaı, moı baı» jobasy tolyǵymen debıýt sanalady. Komedııany jyly qabyldady. Bul joly kórermenniń úmitin aqtadyq. Fılm kelgenderdiń bárin rızashylyqqa bóledi. Kartına arqyly kórermen júregine jol tapqan ómirsheń ázil zaldaǵylardy kúlkige qaryq qyldy. Ásirese, erler jaǵynyń qatty kúlgenin baıqadym. Keıipkerlerge qarap, ózderin tanyǵan bolar», – dedi komedııalyq fılminiń rejısseri Anvar Matjanov.
Fılm avtorlary komedııa aıaqtalǵanda kórermenderdiń oryndarynan turyp, uzaq qoshemet kórsetýin shynaıy da jaqsy baǵa dep qabyldady.
Aınash ESALI,
«Egemen Qazaqstan»
ALMATY
