Qyrkúıek aıynda bastalǵan áskerge shaqyrý naýqany kezeńinde Memlekettik kúzet qyzmetiniń «Aıbyn» jáne «Batyr» Prezıdenttik polkterine qabyldanǵan 295 jas sarbaz Almatydaǵy 0111 Áskerı bóliminde Otan aldynda ant qabyldady. Bul rásim áskerıler úshin erekshe joralǵy sanalyp, sarbazdardyń boıyndaǵy patrıotızm, Otanǵa jáne Prezıdentke adal bolý, sondaı-aq Qazaqstan Respýblıkasy Memlekettik kúzet qyzmetiniń qatarynda adal qyzmet atqarý tárizdi qasıetterge baýlıdy.
Talap boıynsha Memlekettik kúzet qyzmetiniń sapynda sapqa turý úshin úmitkerler san synaqtan súrinbeı ótýge tıis. Bıylǵy naýqandaǵy irikteý barysynda da sarbazdardyń zııatkerlik qabiletine, qysyltaıań jaǵdaıdaǵy batyldyǵy men durys sheshim qabyldaı alý sheberligine, tártibi men qyraǵylyǵyna aıryqsha nazar aýdarylǵan. Olardyń sporttyq jetistikterine de zor mán berilipti. Máselen osy jyly qyzmet qataryna shaqyrylǵan jas tolymdaýlardyń sapalyq minezdemesi joǵary deńgeıde ekenin aıtýǵa bolady. Eki júzden artyq áskerı qyzmetshilerdiń 17 prosentiniń joǵarǵy bilimi bar bolsa, 67 prosenti orta-arnaıy bilimi týraly dıplommen kelgen. Jas sarbazdardyń arasynda 4 sport sheberi, 19 sport sheberligine úmitker bar.
О́te jaýapty mindetterdi minsiz atqarý úshin atalǵan qyzmette sarbazdardyń keshendi dene shynyqtyrý jáne jaýyngerlik daıarlyǵyna asa nazar aýdarylady. Olar saptyq amaldardy, jaýyngerlik qarýdan atýmashyq-daǵdysyn, sondaı-aq jaýyngerlik tehnıkany qurǵaq jerde jáne sýda júrgizýdi jáne taǵy basqalardy meńgeredi. Sporttyq jetistikteri bar jaýyngerlerdiń ártúrli deńgeıdegi, onyń ishinde álemdik dárejedegi sporttyq jarystarǵa qatysý múmkindigi mol.
– Elbasymyz qazan aıyndaǵy Joldaýynda áskerı-patrıottyq tárbıeniń rólin kúsheıtý týraly aıtqan bolatyn. Otandy, halqyn, tilin qurmetteýge tárbıelengen urpaq týǵan jerin, elin qorǵaýǵa qabiletti bolady. Elimizge adal qyzmet etý jáne ony qorǵaý árbir azamattyń qasıetti boryshy. Búgin Sizder Tuńǵysh Prezıdent kúni qarsańynda Otanǵa minsiz qyzmet etýge jáne ony qorǵaýǵa áskerı ant qabyldadyńyzdar.Táýelsizdik alǵan jyldary Qazaqstan ozyq elderdiń qataryna qosylyp, shet memlekettermen dostastyǵymyz arta tústi. Sizder áskerı isti jaqsy meńgerip, komandırlerdiń buıryqtaryn buljytpaı oryndap, adal qyzmet atqara otyryp, Qazaqstannyń Máńgilik el bolýyna óz úlesterińizdi qosasyzdar, – dedi saltanatty jıynda sarbazdardy quttyqtaǵan Memlekettik kúzet qyzmeti bastyǵynyń orynbasary- Obektilerdi qorǵaý qyzmetiniń bastyǵy general-leıtenant Muhtar Aıýbaev.
Áskerı ant qabyldaý rásimine Almaty qalasy Ákimdiginiń ókilderi, qoǵam qaıratkerleri, QR Memlekettik kúzet qyzmetiniń ardagerleri, jas sarbazdardyń ata-analary men týystary qatysty. Memlekettik kúzet qyzmetiniń áskerı qyzmetkerleri ózderiniń sheberlikterin, kásipqoılyǵy men is-qımyldarynyń úılesimdigin kórsetip jıylǵandardy tánti etti. О́z kezeginde jas sarbazdar da qysqa merzimde alǵan mashyq-daǵdylaryn, sonyń ishinde qarýmen jáne qarýsyz ıgergen saptyq amaldaryn pash etip, kópshilik aldynda saltanatty marshpen júrip ótti. Sondaı-aq Prezıdenttik úrmeli aspaptar orkestri men qurmet qaraýyl rotasy plas-konserttiń (defıle) jańa baǵdarlamasyn kórermen nazaryna usyndy.
Otan aldynda ant qabyldaǵan sarbazdar aldaǵy ýaqytta QR Memlekettik kúzet qyzmetiniń Astana men Almaty qalalaryndaǵy áskerı bólimderi boıynsha taratylyp, áskerı merzim aralyǵynda júktelgen asa jaýapty mindetterdi atqarýǵa kirisetin bolady.
Arman OKTIаBR,
«Egemen Qazaqstan»
ALMATY
