Árıne, elimizdiń zeınetaqy júıesin, onyń qurylymyn tolyq túsinbeı jatyp bolashaq zeınetaqyny josparlaý múmkin emes. Sondyqtan BJZQ, jınaqtaýshy zeınetaqy júıesiniń barlyq qarjylyq jáne aqparattyq aǵynynyń biryńǵaı operatory retinde ár túrli baılanys arnalary arqyly mańyzdy, shynaıy aqparatty árbir azamatqa jetkizýge kúsh salýda.
2018 jyldyń 20 qarashasynda Qordyń barlyq fılıaldarynda «Barlyq salymshylar úshin qoljetimdi BJZQ» taqyrybynda Ashyq esik kúni ótken edi. Oǵan alǵash ret joǵary synyp oqýshylary men stýdentter shaqyryldy. Sondaı-aq, BJZQ basshylyǵy aǵymdaǵy jyldyń qarasha-jeltoqsan aılarynda elimizdiń jetekshi joǵary oqý oryndarynyń stýdentterimen kezdesý ótkizýdi josparlaǵan bolatyn. Osyǵan oraı alǵashqy úsh kezdesý ótkizildi.
22 qarashada «BJZQ» AQ Basqarýshy dırektory Janara Tólegenova Abaı atyndaǵy Qazaq ulttyq pedagogıkalyq ýnıversıtetiniń (Almaty q.) stýdentterimen kezdesse, Qordyń Basqarýshy dırektory Máýlen О́teǵulov Q.Sátbaev atyndaǵy Qazaq ulttyq tehnıkalyq zertteý ýnıversıtetiniń (Almaty q.) stýdentterimen kezdesip, zeınetaqymen qamsyzdandyrý máselesi boıynsha qyzyqty áńgime júrgizip, bolashaq jas mamandardyń suraqtaryna jan-jaqty jaýap berdi.
23 qarashada «BJZQ» AQ Basqarma tóraıymynyń orynbasary Sáýle Egeýbaeva О́skemen qalasynda D.Serikbaev atyndaǵy Shyǵys Qazaqstan memlekettik tehnıkalyq ýnıversıtetiniń stýdentterimen kezdesý ótkizdi.
Spıkerler zeınetaqymen qamsyzdandyrý máselesinde jınaqtaýshy zeınetaqy júıesiniń erekshe mańyzǵa ıe ekendigin jetkizdi. О́ıtkeni, jastardyń bolashaq jıyntyq zeınetaqysy jarnalardyń Qorǵa turaqty aýdarylýyna tikeleı baılanysty bolady. Sonymen qatar Qor basshylyǵy zeınetaqy zańnamasyndaǵy ózgerister jáne zeınetaqy kapıtalyn kóbeıtý joldary týraly áńgimeledi.
Kezdesý barysynda jastardyń kópshiligin Qor men salymshylar arasyndaǵy baılanys arnalary, sondaı-aq, zeınetaqy qyzmetterin qashyqtyqtan alý múmkindikteri qyzyqtyrdy. Al jumys isteıtin stýdentter azamattyq-quqyqtyq sharttar boıynsha alǵan tabystan mindetti zeınetaqy jarnalaryn tóleý týraly suraqtar qoıdy.
Jyl sońyna deıin taǵy jeti ýnıversıtette osyndaı kezdesýler ótkizilmek. 26 qarashada S. Toraıǵyrov atyndaǵy Pavlodar memlekettik ýnıversıtetinde, M.О́temisov atyndaǵy Batys Qazaqstan memlekettik ýnıversıtetinde jáne E.Býketov atyndaǵy Qaraǵandy memlekettik ýnıversıtetinde kezdesýler ótkiziledi. Sonymen qatar osyndaı kezdesýler 28 jáne 30 qarashada T. Rysqulov atyndaǵy Qazaq ekonomıkalyq ýnıversıteti men Halyqaralyq aqparattyq tehnologııalar ýnıversıtetinde jalǵaspaq. Al jeltoqsan aıynda mundaı kezdesýler L.Gýmılev atyndaǵy Eýrazııa ulttyq ýnıversıteti men M.Áýezov atyndaǵy Ońtústik Qazaqstan memlekettik ýnıversıtetinde uıymdastyrylady
Aınash ESALI,
«Egemen Qazaqstan».
ALMATY
