Biz aıtyp otyrǵan Túrkistan oblysy jumyspen qamtýdy úılestirý jáne áleýmettik baǵdarlamalar basqarmasynyń «№8 arnaýly áleýmettik qyzmetter kórsetý ortalyǵynda» múgedek jandarǵa jan-jaqty qamqorlyq jasalyp, jaqsy kóńil-kúı syılaý maqsatyndaǵy túrli is-shara jıi ótkizilip turady. Al negizi Shymkent qalasyndaǵy atalǵan ortalyqta jyl kóleminde 960 múmkindigi shekteýli jan ońaltýdan ótedi eken. Ár aı saıyn stasıonarlyq-sanatorııalyq rejimde aýdandardan – 45, Shymkent qalasynan 30 múgedek kúndizgi bólimde qabyldanady. Osy arada aıta ketelik, Eńbek jáne halyqty áleýmettik qorǵaý mınıstrliginiń málimetinshe, sońǵy bes jylda elimizde múgedektigi bar adamdardyń sany 7,5%-ǵa ulǵaıǵan. Sol sebepten de bolar, ortalyq qyzmetin alýǵa nıettiler qatary kóbeıe túsken jáne olar bul múmkindikti uzaq kútýge májbúr. Ortalyqtyń olarǵa bereri mol, mysaly dárigerlerdiń nusqaýlary boıynsha em alady, dene shynyqtyrý jattyǵýlaryn jasaıdy, sondaı-aq túrli dári-dármekterdi, dárýmenderdi qabyldaıdy. Sporttyq estafetalyq toptyq oıyndarǵa densaýlyqtaryna qaraı qatysady. Basqa da mádenı is-sharalarǵa qatysý úshin arnaıy kólik qyzmeti usynylady. О́zdiginen eńbek etýge kómektesedi. Eńbekpen emdeý arqyly ómirge degen kózqarasyn jaqsartyp, qyzyǵýshylyqtaryn oıatady. Monshaqtan, bısermen ártúrli buıym jasaýdy úırenedi. Tigin mashınasymen jumys istep, quraq kórpesheler, jastyqtar, kóılekter tigedi jáne joǵaltqan turmystyq daǵdylaryn qaıta qalpyna keltiredi. Qyzmet alýshylardyń óz qoldarynan jasaǵan buıymdarynan kórme uıymdastyrylady. О́zin-ózi qamtamasyz etý jáne materıaldyq jaǵdaılaryn jaqsartýǵa qatysty baǵyt-baǵdar, keńes beriledi.
– Elbasy N.Nazarbaev Joldaýynda «múmkindigi shekteýli tulǵalarǵa arnalǵan «kedergisiz orta» qalyptastyrýǵa zor mán berilýi tıis» ekenin atap kórsetti. Jalpy, Memleket basshysy múgedekter máselesine erekshe mán berip keledi. Sonyń nátıjesinde memleket tarapynan kórsetilip jatqan qoldaý- kómekter kóp. О́zin kem sezinbeýi úshin ortalyq qyzmetin paıdalanýshy jandarǵa otbasylyq kásipkerlikti ashý jáne damytý úshin «Atameken» qorynyń oblys boıynsha aımaqtyq fılıaly bıznes sabaqtaryn júrgizedi. Onda kásipkerlik joldary jan-jaqty túsindiriledi. Qyzmet alýshylarǵa jeńildikter, járdemaqylar, ótemaqylar men basqa da tólemderdi alýǵa keńes beriledi. Ortalyq I, II toptaǵy múmkindigi shekteýli azamattarǵa ońaltý qyzmetterin kórsetedi. Ol qyzmetterdi alǵan soń densaýlyqtarynda oń ózgeris bolyp, jeke kásip ashqandary da barshylyq. О́mirge degen qulshynysy artyp, alǵysyn bildirip jatqandary da az emes. Kezinde mekemede ońaltýdan ótken Ermek Qalymbetov túrli sporttyq jarystarda joǵary deńgeıde óner kórsetip, qolarba jarysynan Azııa chempıony atandy. Kentaý qalasynan kelip, ońaltýdan ótken Aıdos Qalıev búginde kóptegen mádenı is-sharada konserttik baǵdarlamalarmen óner kórsetýde. Al múmkindigi shekteýli Bóribek Jylqybaev qoldyń usaq motorıkasyn jaqsartý maqsatynda iri monshaqtardan ártúrli buıym jasap, mekememizdiń atynan qolóner sheberleri kórmelerine qatysyp júr», deıdi «№8 arnaýly áleýmettik qyzmetter kórsetý ortalyǵy» kommýnaldyq memlekettik mekemesiniń dırektory Gýlııa Jazyhbaeva. Sondaı-aq múmkindigi shekteýli azamattardyń áleýmettik mártebesin kóterý, tarıhı jádigerge súıispenshiligin arttyrý, ólkesin tanytý, patrıottyq sezimin odan ári qalyptastyrý maqsatynda aı saıyn óńirdegi murajaılarmen tanysýyna múmkindik jasalady eken. «Bul mekemege 2012 jyldan beri kelip em alýdamyn. Emniń barlyq túri qarastyrylǵan. Ortalyqqa kelgen kúnnen bastap jaqsy kóńil-kúıde júremiz. Densaýlyqty nyǵaıtýǵa arnalǵan emdik prosedýralardy kórsetetin mamandardyń kásibı biliktiligi joǵary dárejede, ońaltý ortalyǵynyń qyzmetkerlerine aıtar alǵysym sheksiz», deıdi I top múgedegi Erahan Seıtbekov.
Joǵaryda aıtyp ótkenimizdeı, ortalyq qyzmetine muqtaj jandar kóp. Alaıda ony qalaǵan mezgilinde qabyldaý múmkin bolmaı otyr. Onyń bir sebebi – ortalyq ornalasqan ǵımarat tarlyq etýde. Bul óz kezeginde múmkindigi shekteýli jandardyń emin-erkin qozǵalysyna da keri áserin tıgizýde. Iаǵnı talapqa saı tıptik ǵımarat qajet. Bul oraıda Eńbek jáne halyqty áleýmettik qorǵaý mınıstri Mádına Ábilqasymovanyń «Astana, Almaty, Shymkent qalalarynyń ákimderi ońaltý kómeginiń qoljetimdigin jaqsartý úshin qosymsha ońaltý ortalyqtaryn ashý jónindegi qajetti sharalar qabyldaýy qajet» degen málimdemesi kóńilge senim uıalatady. Mınıstrlik málimetine qaraǵanda, elimizde 192 qalpyna keltirý emi jáne medısınalyq ońaltý uıymdary jumys isteıdi. Olardyń 129-y memlekettik jáne 63-i jekemenshik uıymdar. О́tken jyldyń qorytyndysy boıynsha bekitilgen normatıv 25-ke teń bolǵan kezde halyqtyń ońaltý tósektermen qamtamasyz etilýi 10 myń adamǵa shaqqanda barlyǵy 1,4 tósekti quraǵan. Iаǵnı ońaltý jáne qalpyna keltirý emderimen qamtamasyz etýdiń jetkiliksiz ekeni baıqalady. Mınıstrdiń málimdeýinshe, 18,7 mlrd teńge somasynda 5 jergilikti memlekettik – jekemenshik áriptestik jobalary josparlanyp otyr.
Iá, ýaqyt óte talapqa saı ǵımarat salynyp, qosymsha ońaltý ortalyǵy da ashylar. Eń bastysy, búginde múmkindigi shekteýli jandar ońaltý ortalyǵynda em qabyldaı júrip, janyn jiti túsinetin, ózi sekildi taǵdyrlas, muńdas jandardy taýyp, jaqyn aralasý, dostasý arqyly da qoǵamnyń belsendi múshesi ekenin sezinýde.
Ǵalymjan ELShIBAI,
«Egemen Qazaqstan»
Túrkistan oblysy
