Jıynda «Qazteleradıo» AQ basqarma tóraǵasy E.Tájibekov Jambyl oblysynda analogtyq habar taratýdy toqtatý isi «Sıfrly Qazaqstan» baǵdarlamasyn júzege asyrýdyń kezekti sharasy ekenin, sondaı-aq Jambyl oblysyndaǵy SETT-qa tabysty kóshýdi qamtamasyz etý úshin atqarylǵan jumystar týraly aıtty.
«Oblysta sıfrly efırlik telehabar taratý jobasyn iske asyrý tolyq aıaqtaldy. Búgingi tańda 44 sıfrly taratqyshtardy qosýmen, 43 radıotelevızııalyq stansalar salyndy jáne jańǵyrtyldy. Bul oblys halqynyń 99,8%-y turatyn 377 eldi mekendi qamtýǵa múmkindik beredi. О́ńirde alty eldi meken sıfrly efırlik habar taratýmen qamtylmaǵan, biraq sapaly telehabar taratý olar úshin qoljetimdi. Qazirgi tańda atalǵan eldi mekenderde 466 úı sharýashylyǵy tirkelgen, olardyń árqaısysy «OTAU TV» ulttyq spýtnıktik telehabar taratý júıesine qosylǵan», dedi E.Tájibekov.
Oblys ákimdiginiń qoldaýymen halyqty aqparattandyrý boıynsha belsendi jumys júrgizilýde. Jambyl oblysy ishki saıasat basqarmasynyń basshysy Berik Qurmanǵalıdiń aıtýynsha, aımaq turǵyndaryn habardar etý maqsatynda sıfrly efırlik telehabar taratý boıynsha jarnamalyq beınerolıkter Taraz qalasynyń barlyq LED-dıspleıleri boıynsha kórsetiledi. Oblys aýdandary boıynsha 57 aqparattyq bılbord ornalastyryldy jáne óńirlik BAQ arqyly halyqty aqparattandyrý boıynsha belsendi jumys júrgizilýde. Sondaı-aq ol ataýly áleýmettik kómek alatyn otbasylarymen jumys týraly aıtty.
«Oblysta ataýly áleýmettik kómek kórsetýge jatatyn 8975 otbasy tirkelgen, onyń 6631-i SETT qyzmetine qosylǵan. Qalǵan 2344 otbasy sıfrly qabyldaǵyshtarǵa ıe boldy jáne sıfrly efırlik teledıdarǵa qosylý múmkindigine ıe», dedi Berik Qurmanǵalı.
Esterińizge sala keteıik, «Sıfrly Qazaqstan» baǵdarlamasy aıasynda elimizdiń barlyq óńirlerin analogtyq telehabarlar taratýdan kezeń-kezeńmen ajyratý josparlanyp otyr. Osy baǵdarlamaǵa sáıkes 2021 jylǵa qaraı Qazaqstan analogtyq habar taratýdan tolyq bas tartady.
Hamıt ESAMAN,
«Egemen Qazaqstan»
Jambyl oblysy
