Janbolat KENJEǴUL
Mádenı ómirimizdiń kórkemdik qoryn jańǵyrtyp, asyl qazynamyzdy dáripteýde búgingideı is-sharalardyń mańyzy zor. Sondyqtan da bolar Segiz seriniń ómiri men ónerin zertteýge degen qyzyǵýshylyq arta túsken. Máselen, kompozıtor, Memlekettik syılyqtyń laýreaty Balnur Qydyrbek: «Barlyq sınkretti óner ıeleri sııaqty, Segiz seri ánderiniń alǵashqy oryndaýshysy ózi boldy. Shyǵarmalaryn taldap otyryp baıqaıtynymyz: seri atanyń daýys dıapazony dramalyq barıtonnan dramalyq tenorǵa deıin meılinshe keń bolǵan. Dem alý barysy da aýqymdy» dep sıpattama beredi. Demek, seriniń ánderi men shyǵarmalaryn oryndaýda úlken jaýapkershilik pen bıik deńgeı qajet. Al Astana tórinde ótken qorytyndy konsertte «Saryarqa» halyq mýzyka ansambli bul údeden shyǵa bildi.
Konserttik baǵdarlamany tamashalaýǵa jınalǵan qaýymnyń arasynda Qýanysh Sultanov, Abaı Tasbolatov, Káribaı Musyrman, Omarhan О́ksikbaev, Shavqat О́temisov jáne Turǵyn Syzdyqov syndy el qalaýlylary men Serik Negımov, Nesipbek Aıtuly sekildi basqa da zııaly qaýym ókilderi boldy.
Keshti kúıshi, kompozıtor, óner zertteýshisi Qaıyrjan Maqanov júrgizip otyrdy. Ár nomerdi habarlamas buryn onyń shyǵý tarıhy men oryndaýshysyn egjeı-tegjeıli tanystyryp otyrǵan ol: «Segiz seri men Nııaz seriniń Kishi júz jerine kelgen ýaqyty – shamamen 1834 jyl. Olar Edil ózeniniń Kepter degen salasyn mekendegen Ysyq rýynan Qosaıaq uly Qaldybaı batyrdyń aýylyna túsedi. Qaldybaıdyń on uly, Ǵaını esimdi jalǵyz qyzy bolady. Ǵaını sulý men Segiz seriniń ǵashyqtyq hıkaıasy osy tustan bastalǵan», deıdi.
Segiz seriniń áni «Ǵaınıdi» halyqaralyq «Shabyt» festıvaliniń laýreaty Jaqsykeldi Maıasarov oryndady. Al «Áıken-aı» ánin respýblıkalyq baıqaýlardyń laýreaty Jalǵas Sultan, «Qarǵam-aýdy» halyqaralyq «Shabyt» festıvaliniń bas júldegeri Danııar Muqan oryndasa, «Aqerke» ánin jyrshylar baıqaýynyń bas júldegeri Aınur Qonysbaeva shyrqady. «Aqbaqaıdy» naqyshyna keltirip jetkizgen mádenıet salasynyń úzdigi Nuraı Tanabaeva boldy. О́zge de ónerpazdar seriniń ánin syzylta salyp, zaldaǵy jurttyń ystyq yqylasyna bólenip jatty.
Sahnaǵa Bıbigúl Tólegenova shyǵyp, óner kórsetkende kelgen jurt oryndarynan tik turyp qoshemet kórsetti. Qazaqtyń bulbul kómeı, jeztańdaı ánshi qyzynyń bul kelisi keshtiń shyraıyn kirgizip, salmaǵyn arttyra tústi.
Janbolat KENJEǴUL,
«Egemen Qazaqstan»
