Eýrazııa ulttyq ýnıversıteti men Qazaqstan Respýblıkasynyń Ulttyq ulany birlesip uıymdastyrǵan sharanyń negizgi maqsaty áskerı jýrnalısterdi daıarlaý jáne aradaǵy baılanysty odan ári nyǵaıtý boldy.
Aýqymdy sharaǵa Eýrazııa ulttyq ýnıversıtetiniń prorektory Dıqan Qamzabekuly, Ulttyq ulan bas qolbasshysynyń tárbıe jáne áleýmettik-quqyqtyq jumystar jónindegi orynbasary, general-maıor Muhametqalı Satov, Jýrnalıstıka jáne saıasattaný fakýltetiniń dekany Qaırat Saq, ýnıversıtet oqytýshylary men stýdentteri, Ulttyq ulannyń áskerı qyzmetshileri men ardagerler, áskerı basylym basshylary qatysty.
Konferensııa aıasynda Eýrazııa ulttyq ýnıversıteti men Ulttyq ulan arasyndaǵy yntymaqtastyq týraly Memorandýmǵa qol qoıylyp, Jýrnalıstıka jáne saıasattaný fakýltetinde Ulttyq ulannyń áskerı jýrnalıstıka aýdıtorııasynyń ashylý saltanaty ótti.
Saltanatty jıyn barysynda general-maıor Muhametqalı Satov memorandýmnyń mán-mańyzyna toqtalyp ótti. «Búgin 1 jeltoqsan –Tuńǵysh Prezıdent kúnine oraı óte aýqymdy shara ótkizip jatyrmyz. Ulttyq ulannyń áskerı jýrnalıstıka aýdıtorııasyn ashý – eń aldymen, Elbasy maqalalaryndaǵy jastardy patrıotızm men otansúıgishtik rýhta tárbıeleý baǵytyndaǵy alǵashqy qadamymyz. Ekinshiden, biz yntymaqtastyq týraly memorandýmǵa qol qoıdyq. Bul memorandýmnyń negizgi maqsaty – Eýrazııa ulttyq ýnıversıtetiniń stýdentteri men áskerı qyzmetkerler arasynda ıdeologııalyq-tárbıelik jumystardy birlesip uıymdastyrý», dedi ol.
Fakýltet dekany Qaırat Saqtyń aıtýynsha, mundaı bastamalar sapaly maman daıyndaýǵa múmkindik beredi. «Qazir salalyq jýrnalısterdi daıyndaý baǵytynda kóptegen jumystar júrgizilýde. Sonyń biri – áskerı jýrnalısterdi daıyndaý. Biz bolashaqta jańa oqý baǵdarlamasyn júzege asyrýdy josparlap otyrmyz. Osy kezge deıin áskerı jýrnalıster basqa elderdiń kómegimen daıyndalyp keldi. Endi táýelsiz elde óz áskerı jýrnalısterimizdi ózimiz daıyndaýymyz kerek. Osyndaı arnaıy baǵdarlamalar básekege qabiletti maman daıyndaýǵa negiz bolady».
Konferensııada áskerı jýrnalıstıkanyń tarıhynan bastap, onyń aqparattyq keńistiktegi róli, damý tendensııasy talqylandy.
Shara Ulttyq ulannyń án-bı ansambliniń ujymy daıyndaǵan «Uly dala ulandary» atty konserttik baǵdarlamamen aıaqtaldy.
Qarlyǵash QURAMYS,
«Egemen Qazaqstan»
