Dóńgelek ústel jumysyna Azamattyq qoǵam isteri komıtetiniń tóraǵasy Á.Ǵalymova, «Medıatorlardyń ulttyq palatasy» RQB basqarma tóraǵasy S.Romanovskaıa, «Medıatorlardyń ulttyq palatasy» RQB ókili M.Dıachýk, «Qazaqstandyq medıatorlar palatasy» QB basshysy E.Esimbetova, «Qazaqstandyq Medıasııa, Moderasııa, Fasılıtasııa, Kelissózder ortalyǵynyń» dırektory I.Vıgovskaıa jáne «Dıalog» shıelenisti sheshý ortalyǵynyń» dırektory T.Savıskaıa jáne osy salanyń mamandary qatysty.
Jıynnyń basty maqsaty – azamattar arasyndaǵy daýly jáne shıelenisti jaǵdaılardy medıasııa arqyly sheshý mádenıetin qalyptastyrý, medıasııa ınstıtýtyn nasıhattaý jáne damytý. Búgingi tańda elimizde 84 medıasııa ortalyǵy, 2 000-nan astam medıator jumys isteıdi. Qylmystyq daýlar boıynsha medıasııa rásimderiniń eń kóp sany – 54%, otbasylyq – 24%, kommersııalyq daýlar boıynsha – 9%.
Jıyndy ashqan Álııa Ǵalymova mınıstrliktiń elde medıasııa ınstıtýtyn damytý boıynsha jasap jatqan sharalaryna toqtalyp ótti. «Birinshiden, bıyl 9 tamyzda qoǵamdaǵy qarym-qatynastardyń turaqtylyǵyn saqtaý, qoǵamdaǵy daýkestik deńgeıin tómendetý, quqyqtyq sanany arttyrý, eldegi medıasııa mádenıetine jaǵdaı jasaý maqsatynda mınıstrlik Joǵarǵy Sotpen ózara yntymaqtastyq týraly memorandýmǵa qol qoıyldy. Mınıstrlik bekitilgen memorandým aıasynda «2018-2019 jyldarǵa arnalǵan medıasııa ınstıtýtyn damytýdy qoldaý jónindegi jol kartasy» ázirleýde. Ekinshiden, quramyna bedeldi medıatorlar, sarapshylar, azamattyq sektor ınstıtýttarynyń ókilderi jáne basqa da múddeli memlekettik organdar kiretin «Qoǵamdyq damý mınıstrligi janynda medıasııa ınstıtýtyn damytý máseleleri jónindegi respýblıkalyq keńes» qurý boıynsha jumys júrgizilýde», dedi ol. Sondaı-aq ol medıasııa týraly zańnamany jetildirý jónindegi, kásipqoı jáne kásipqoı emes medıatorlardyń respýblıkalyq tizimin qurý jónindegi usynystardy ázirleý úshin jumys toby qurylýda ekenin aıtyp ótti.
О́z baıandamasynda ShQO «Medıatorlar ulttyq palatasy» RQB ókildiginiń dırektory Marıanna Dıachýk sot isterindegi medıasııanyń mańyzdylyǵyna toqtaldy. «Daýdy beıbit retteýge yqpal etý sot isin júrgizýdegi tásilderdiń biri bolyp tabylady», dep atap ótti.
«Medıatorlar ulttyq palatasy» RQB basqarmasynyń tóraǵasy Svetlana Romanovskaıa óz kezeginde «Qoǵamdyq keńestiń, Ombýdsmenniń jáne onyń apparatynyń ózara is-qımyly, olardyń birlesken qyzmeti taýarlar men qyzmetter naryǵynda zamanaýı qatynastardy qalyptastyrýǵa, kásipkerlerdiń básekege qabilettiligin arttyrýǵa, tutynýshylardyń quqyqtyq saýattylyǵyn arttyrýǵa jáne elimizdiń órkendeýine yqpal etetinin», aıtty.
Jıyn sońynda elimizdegi medıasııa ınstıtýtyn damytý boıynsha usynystar qabyldandy. Medıasııa týraly zańnamany jetildirý jónindegi jumys tobynyń quramyna birqatar usynystar ázirlendi.
Mádına JÁLELQYZY,
«Egemen Qazaqstan»
