Mekeme basshysy Tóleý Áshirhannyń aıtýynsha, Elbasy tapsyrmasyna sáıkes, kommýnaldyq qyzmettiń quny 136-dan 103,88 teńgege nemese 23,88 paıyzǵa arzandatylǵan. Sondaı-aq, tómen jalaqy alatyn 60-tan astam azamattyń eńbekaqysyn kóterý maqsatynda mekeme bıýdjetinen 1 mln. 600 myń teńge qaralyp otyr. Qalany jylýmen qamtamasyz etetin mekeme 2011 jyly qurylǵan. Seriktestikte 395 adam jumys isteıdi. Kentaý qalasyna arnaıy jumys saparymen barǵan Túrkistan oblysynyń ákimi Janseıit Túımebaev halyqqa sapaly qyzmet kórsetý baǵytynda tıisti sharalardy der kezinde atqarýdy tapsyrdy.
Sonymen qatar oblys ákimi Oranǵaı aýyldyq okrýgindegi «Ál-Bereke» aýyl sharýashylyǵy óndiristik kooperatıviniń tynys-tirshiligimen tanysty. Kókónis jáne jemis-jıdekterdi qaıta óńdeý, saqtaý jáne daıyn ónimdi ótkizýmen aınalysatyn kooperatıv jylyna 450 myń lıtr jemis-jıdek shyrynyn, 1500 tonna kókónis marınadyn, 1200 tonna tomat, alma, asqabaq ezbelerin daıyndaýǵa qaýqarly. Kooperatıvte 30 adam turaqty jumyspen qamtylǵan. Bıylǵy 11 aıda jalpy sommasy 292 mln. teńgeni quraıtyn 1950 tonna taýar óndirgen, onyń 1200 tonnasyn ishki naryqqa ótkizse, 750 tonnasyn Reseıge eksporttaǵan.
Ǵalymjan ELShIBAI,
«Egemen Qazaqstan»
Túrkistan oblysy
