8,6 myń sharshymetrge sozylyp jatqan jańa alańnyń jobalyq quny 105 mln. teńgege jýyq. Munda bıiktigi 15 metrlik «Jeti keremet» monýmenti, beıne baqylaý kameralary, jaryqshamdarmen qosa, sońǵy úlgidegi LED ekran ornatylǵan. Arnaıy jol tartylyp, alańdy aınala 3 avtoturaq salynǵan. Bolashaqta kópshilik sharalar uıymdastyrylyp, halyq jınalatyn bul alańnyń qurylysyn «Remstroıbyt» JShS jarty jyl ishinde aıaqtap shyǵypty.
Shyńǵyrlaý aýdanynda «Rýhanı jańǵyrý» baǵdarlamasy boıynsha da kóp jumys atqarylyp jatyr. Dál osy kúni aýdan ortalyǵynda kúlli qazaqqa ortaq abyz – Asan Qaıǵyǵa arnalǵan «Dala ańyzy» atty eskertkish ornatyldy. Shyńǵyrlaýlyqtardyń Asan Qaıǵyny ózderine jaqyn tartýynyń sebebi bar – «Qarǵaboıly Qaztýǵan» jyrynda:
Asan Qaıǵy kóshken jer
Shyńǵyrlaý, Toryatbasy edi,
Qyzemshekti Saryshoqy
Osy sýdyń qasy edi.
Asan Qaıǵy týǵannyń
Bólingen jeri osy edi...» - dep keledi. Osy úzindide atalǵan jer ataýlarynyń bári de shyńǵyrlaý aýdany aýmaǵynda, áli kúnge solaı atalyp kele jatyr.
- Aýdanda atqarylǵan izdenis jumystarynyń arqasynda jerimiz jáne ata-babamyz jóninde kóptegen maǵlumat jınaqtaldy. Olar kitap, baspasóz betterinde jaryq kórýde. Sonymen qatar Elbasy jaqynda ǵana «Uly Dalanyń jeti qyry» maqalasynda «Dala folklorynyń antologııasy» jáne «Uly dalanyń uly esimderi» atty bastama kóterip, tarıhı tulǵalarǵa eskertkish ornatý baǵytynda tapsyrma bergen bolatyn. Asan Qaıǵy babamyzdyń músini – týǵan jerimizdiń ótken tarıhyna degen qurmet, - dedi Shyńǵyrlaý aýdanynyń ákimi Albert Esálıev eskertkishtiń ashylý saltanatynda.
Jelmaıasyn shógerip qoıyp jol qarap turǵan Asan baba eskertkishiniń avtory – Qazaqstan Sýretshiler odaǵynyń múshesi, músinshi Ibragım Aıdenov. Ol áriptesteri Ahmet Erǵalıev jáne Zakıjan Islambekovpen birge músindi eki aı ishinde jasap shyqqan. Al aýdan ortalyǵyna kórik beretin maǵynaly músinniń bas demeýshisi – jergilikti kásipker Iýsýp Qazıev eken.
Qazbek QUTTYMURATULY,
«Egemen Qazaqstan»
