Jaryqtyq Qarataý arqarlary... «Negizi Tıan-Shan arqarynan ózgesheligi de sol bolsa kerek, – deıdi Qarataý qoryǵy dırektorynyń orynbasary Shora Janataev bir áńgimesinde, – olardyń ózgesheligi múıizderi jýan ári oralymdary qysqa buıraǵa kelmeıtindeı, atalyqtary jylqy tektes bolyp keledi».
Basqa arqarlardy úıirine jolatpaıdy. Qarataý arqarlary basqa taýdyń arqarlaryna qaraǵanda múıizderi qyzǵylt qońyr bolyp keledi. Kóktemde báısheshek endi shyqqanda búr jarǵan shópke jaıylady. Osy jaılaýdy halyq Tońqaıma dep atap ketken. Sol jerde olar jelge artyn berip bastaryn kótermeı jaıylatyn bolǵan. Aqpan aıynyń aıaǵynan bastap atalyq pen analyq arqarlar ekige bólinedi.
Al jas atalyq arqarlar top ishinde analyqtarymen qalady. Quljalary taý basyna bıiktep ketedi. Qarataý qoryǵyna qaraıtyn Túrkistan jáne Sozaq aımaǵyndaǵy bul qoryqtyń Qarataý taýynda mamandar búgingi sanaq boıynsha 365 bas arqar baryn aıtady. Onyń quljasy 160 bas, analyq basy 190, bıylǵy tóli 15 bas. Qoryq ishindegi Biresek ózeniniń bastaý jaǵynda Kókbel kezi ústinde quljalar sol jerdegi qoı tastardy jalaıdy. Sodan baryp kúıis qaıyrady. Aqsaqaldar sol tastar qulja boıyna kúsh beretinin aıtady. Bálkim, alystan bolsa da qoı tastardy izdep keletini ras ta shyǵar.
Aqsaqaldar aıtady: arqarlardyń analyǵy egiz týýy óte sırek, al el aýzyndaǵy áńgimede, egiz qozylary óte kóp bolatyny aıtylady. Kim biledi, ras shyǵar... Qarataý eteginde andyzdaı aǵylǵan arqarlar... Kórip qalsańyz kóz qýanady.
Saparbaı PARMANQUL,
«Egemen Qazaqstan»
ALMATY
