Baıqaý irikteýine 8 ben 12 jas aralyǵyndaǵy 3 578 bala qatysyp, 19 fınalıst iriktelip alyndy. Qazaqstannyń ár óńirinen kelgen irikteý jeńimpazdary «Bala daýysy Astana júreginde» konserttik baǵdarlamasynda vokaldyq sheberlikterin kórsetti.
Saltanatty marapattaý keshinde sóz sóılegen qor quryltaıshysy Álııa Nursultanqyzy óskeleń urpaqty otanshyldyqqa tárbıelep, zııatkerlik jáne tulǵalyq áleýetin damytýda mańyzy zor jobanyń qajettiligi týrasynda sóz qozǵady.
«Qazir materıaldy qundylyqtar saltanat qurǵan zamanda ómir súrip jatyrmyz. Sol sebepti «Bala daýysy» sııaqty ómirsheń jobalar aýadaı qajet. Biz munda sulýlyq pen qýanysh álemimen qaýyshyp, shynaıy ónermen sýsyndaımyz. Tórt balanyń anasy retinde balalarym rýhanı qundylyqty bárinen joǵary qoıatyn ortada ómir súrse deımin. Ol álemdi jasaıtyn da ózimiz. Barlyǵyn ózimizden bastaýymyz kerek. Meıirimdi adamdardyń qolynan uly ister keledi!», dedi baıqaýdyń ıdeıa avtory Álııa Nursultanqyzy.
Telekórermender bir aı boıy balalardyń ónerin tamashalap, ózderine unaǵan úmitkerge daýys bere otyryp, «Halyq súıiktisi» arnaıy ıegeri retinde mańǵystaýlyq Dılnaz Tilepovany laıyq dep tanydy. Baıqaýdyń kásibı qazylar alqasy quramynda Maıra Muhamedqyzy, Jeńis Seıdollauly, Aıqyn Tólepbergen, Danııar О́tegen, Janar Duǵalova, Ásem Jaketaeva jáne Serik Ibragımov sekildi tanymal ónerpazdar tórelik etti. Shyǵysqazaqstandyq Máýlen Ahmetqalıev, Almatydan kelgen Temirlan Osymqul jáne soltústikqazaqstandyq Ámına Japar alǵashqy úsh oryndy ózara bólisti. Barlyq fınalıst «Bala daýysynyń» sımvoly – «Ǵajaıyp nota» júldesimen marapattalyp, estelik syılyqtardy arqalap qaıtty.
Álııa Nazarbaevanyń «Jandaný álemi» qorynyń uıymdastyrýymen elimizdiń daryndy balalaryna arnalǵan aýqymdy joba Mádenıet jáne sport mınıstrliginiń, Qazaqstan Respýblıkasy Tuńǵysh Prezıdenti – Elbasy Qorynyń qoldaýymen ótti. «Bala daýysynyń» tórtinshi maýsymy 2019 jyldyń naýryz aıynda Qostanaıda jalǵasyn tabady.
Aıa О́MIRTAI,
«Egemen Qazaqstan»
