Mine, kóp uzamaı-aq Aııa men Bota Máskeýde ótken «Rýsskıı sılýet» baıqaýynyń tarıhynda jeńiske jetken alǵashqy qazaq dızaınerleri atandy. Atalmysh saıystyń «Shekarasyz baıqaý» bóliginde dúnıeniń ár shalǵaıyndaǵy daryndar óz jumystaryn bir aı boıy ashyq onlaın-daýysqa salady. Jurttan eń kóp daýys jınaǵan modelerler jeńiske jetedi.
Nátıjesinde úzdikterdiń ishinen úzilip shyqqan dızaınerlerimiz basqa qatysýshylarmen birge Máskeýde ótken jas dızaınerlerdiń «Rýsskıı sılýet» HII Halyqaralyq baıqaýynda ózderiniń 5 úlgiden turatyn toptamasyn kórsetýge múmkindik aldy. Reseıdiń barlyq túkpirinen, aınaladaǵy memleketter men Chernogorııa, Qytaı jáne Ońtústik Koreıadan kelgen 94 ismermen birge sán áleminde saltanat qurǵan Qyrǵyzbaevalardyń qoltańbasyna 60-qa tarta qazylar alqasynyń qatarynda Vıacheslav Zaısev, Valentın Iýdashkın, fransýz modeleri Klod Bonýchchı, Bosco di Ciliegi marketıng dırektory Ilıa Kýsnırovıch, Anastasııa Zadorına, Igor Gýlıaev, Vıktorııa Andreıanova, Djemal Mahmýdov, Sergeı Sysoev syndy moda metrleri baǵa berdi.
Aııa men Bota Qyrǵyzbaevalar: «Biz bul baıqaýda avangard stılinde, fýtýrızm baǵytyndaǵy «Jańbyr salǵan sýretter» toptamasyn usyndyq. Kıim úlgilerinde qııaldyq konstrýksııalarǵa, aksessýarlar men bas kıimderde tańdanys týdyrarlyq pishinderge basymdyq berdik. Kolleksııa boıaýlary aq, qara, sur, qyzyl tústerden turady. О́z úlgilerimizdi Qazaqstanda shyǵarylatyn «Evo» fabrıkasy usynǵan aıaq kıimderimen tolyqtyrdyq», deıdi.
Qazaq qyzdarynyń bul baıqaýdan tapqan taǵy bir tabysy olar Máskeýdegi «R.E.D dúkeninde óz kolleksııalaryn usyný» baqytyna ıe boldy.
Aınash ESALI,
«Egemen Qazaqstan»
ALMATY
