«Oqy jáne ózgege usyn» aksııasy 2011 jyly ashyldy. Aksııanyń maqsaty: oqyrmandardyń óz betinshe oqýyn damytý, kórkem ádebıetti, shetel klassık jazýshylarynyń týyndylaryn nasıhattaý. Kez kelgen oqyrman «Oqy jáne ózgege usyn» kitap kórmesinen unaǵan kitabyn tańdap, syıǵa alyp, oqyp, keıin dosyna, tanysyna, kitap súıer oqyrmanǵa usynýyna bolady. Oqyrmandarǵa usynylǵan bul kitaptardyń barlyǵy da qala turǵyndarynan qabyldanǵan jáne kitaphananyń esebinde tirkelmegen kitaptar.
Kitaphana dırektorynyń orynbasary Úrjan Kýdasova Qurmanqyzy óz lebizin bildirip, arnaıy kitaphana №70 jalpy orta bilim beretin mekteptiń kitaphanashysy Bıbatpa Qýantaıqyzy men mekteptiń ishindegi «Qamqorshy» komıtetiniń prezıdenti Saın Saýanaev Mýsagalıulyna 321 kitapty jáne «Adyrna» respýblıkalyq ádebı jýrnaldyń birneshe danasyn qaıtarymsyz syıǵa tartý etti.
Aksııanyń negizgi ıdeıasy – ózara kitaptar almasý. Sol sııaqty kitaphananyń ishinde de «Oqy jáne ózge usyn» kitaphanalyq burysh qoıyldy. Onda qozǵalysy kitap pen oqyrman arasyn jaqyndatýdyń tıimdi joly retinde is-tájirıbege engizilip otyr. Kez kelgen adam oqyǵan qyzyqty kitaptaryn býkkrossıng sórelerine qoıyp, ornyna sol sóreden ózi oqymaǵan kitapty alyp ketýi arqyly dostarymen bólisedi.
Bilimdi urpaq – egemendi eldiń berik tiregi. Biz bilimdi urpaq, bilimdi tulǵa degende rýhanı jan dúnıesi baı, bilim men biliktiligi joǵary, talap-talǵamy tereń, salaýatty ómir saltyn durys qalyptastyrǵan tulǵany aıtamyz. Túbegeıli ózgeristerge bet burǵan jańa qoǵamda tek bilimdi bolý, jetkiliksiz, sondyqtan árbir jeke tulǵanyń boıynda adamgershilik, izgilik, kishipeıildilik, qaıyrymdylyq, batyrlyq, otansúıgishtik, taǵy basqa qasıetter bolý kerek. Kitaphanalar sol oqý oryndaryndaǵy bilimge umtylatyn jas urpaqtyń, sondaı-aq ustazdardyń tabylar jeri. Osy zamanǵy aqparat quraldary damyǵan, jańa tehnologııalar zamanynda da kitap adamnyń ishki dúnıesine, oı-órisine yqpal jasap, muqtajyn qanaǵattandyratyn, rýhanı azyǵy bolyp qala bermek. Búgingi oqýshy erteńgi el mamanynyń eline, jerine degen súıispenshiligin artýy, olardyń boıynda ulttyq namys, otanshyldyq, adamgershilik qasıetteriniń ulǵaıa túsýi jolynda kitaphana qyzmetkerleri - halqymyzdyń qıly tarıhyn, ónegeli ádet-ǵurpy men salt-dástúrin, mádenı muralaryn, ádebıet qazynalaryn, tereńnen tolǵaıtyn sóz ónerin oqyrmandarǵa kitap arqyly nasıhattaı bilýi qajet.
Baqtygúl BAQYTJANQYZY,
S.Jıenbaev atyndaǵy oblystyq
jasóspirimder kitaphanasynyń
bólim meńgerýshisi
Aqtóbe qalasy
