Bizge 1969-2002 jyldardaǵy KazHTI-diń beıorganıkalyq zattardyń hımııalyq tehnologııasy mamandyǵy túlekterine Shaıahmet Moldabekulymen tanysýdyń sáti dıplomdyq jobalar men jumystar daıyndaý kezinde tústi. Júrisi shıraq ári alǵyr jas mamannan kemeldengen, bedeldi, tájirıbeli ulaǵatty ustazǵa aınalǵan ǵalym kafedra túlekterin mamandanýǵa, ǵylymǵa beıimdelýge tómengi kýrstan bastap baǵyttaı otyryp, alǵashqy sátten-aq ózine baýrap alǵan edi. Onyń ashyq, túsinikti, monshaqtaı qoltańbasymen túzetilgen paraqtarymyzdy, syzbalarymyzdy, jazbalarymyzdy qaıtyp alǵanda oljaly bolǵandaı shabyttanyp qalýshy edik. Sol stýdenttik kezder, sondaǵy ustazǵa degen shynaıy rızalyq sezim árqaısymyzdyń áli de jadymyzda.
Máskeý hımııalyq mashına jasaý jáne tyńaıtqysh pen ınsektofýngısıd ǵylymı-zertteý ınstıtýttarynyń túlegi, aspıranty, tehnıka ǵylymdarynyń kandıdaty, dosent Shaıahmet Moldabekulynyń iskerlik qabileti men biliktiligi sol kezdegi ınstıtýt jetekshileri tarapynan da oryndy eskerilip, ol 1970-1980 jyldar aralyǵynda Qazaq hımııa tehnologııalyq ınstıtýtynyń kafedra meńgerýshisi, ǵylymı jumys jónindegi prorektory qyzmetterin abyroımen atqardy, hımııa, tehnıkalyq, tehnologııalyq ǵylymdardyń damýyna, ınstıtýttyń respýblıka, odaq sheńberinde tanylýyna eleýli úles qosty. Osy kezeńde Shymkent, Taraz jáne taǵy basqa óńirlerdegi salalyq óndirister men basqa da mekemeler jas mamandaryn, ıaǵnı ınstıtýt túlekterin óz qamqorlyǵynda ustap, baǵyt berip otyrdy. Osyndaı bolashaqty boljaǵan utymdy is-árekettiń nátıjesi bolar, búginde ınstıtýt túlekteri elimizdegi barlyq salalyq óndiristerdiń bas mamandary men jetekshileri retinde eńbek etýde. M.Áýezov atyndaǵy OQMÝ-de, elimizdiń basqa da oqý oryndarynda qyzmet etetini pedagog-oqytýshylar, jetekshi mamandar, ǵylym kandıdattary men doktorlary, ulttyq ǵylymı jáne ınjenerlik akademııalar akademıkteri, ákimder men mınıstrlerdiń arasynda Qazaq hımııa tehnologııalyq ınstıtýty túlekteriniń qatary mol. Olardyń barlyǵy Shaıahmet Moldabekulyna ystyq iltıpatyn jetkizýge árdaıym daıyn.
Shaıahmet Moldabekulyna 1980-1987 jyldar aralyǵynda Kazaq hımııa tehnologııalyq ınstıtýtynyń rektory qyzmetin atqarý mindetteldi. Talanty men darynyna kúsh-qýaty, alǵyr da ushqyr oı-sezimi sáıkes ol tapsyrylǵan jaýapty mindetti joǵary nátıjemen atqara bildi. Nátıjesinde, Qazaq hımııa tehnologııalyq ınstıtýty odaq kóleminde tanylyp, búkilodaqtyq úzdik, aldyńǵy sheptegi joǵary oqý oryndarynyń qataryna endi. Instıtýtta respýblıkalyq, odaqtyq deńgeıde ótetin bilim, ǵylym jáne jastar tárbıesine baılanysty jalpylama májilister men keńester uıymdastyrylyp, zamanaýı ózekti máseleler sheshimin taýyp jatty. Oqý orny quramynda jańa mamandyqtar ashyldy, sheteldik jáne odaqtaǵy jetekshi joǵary oqý oryndarymen baılanys nyǵaıdy, jańa oqý ǵımarattary, stýdentter jataqhanalary, ashanalar, ujymdyq profılaktorııa, sport keshenderi, demalys mekenderi men jylyjaılar, sýburqaq iske qosyldy, jas oqytýshylar baspanamen qamtamasyz etildi. Osyndaı qyrýar mańyzdy istermen qatar rektorlyq mindetti oryndaýda ǵylymı shyǵarmashylyq baǵyttarǵa, oqytýshy-pedagogter quramynyń sapasyn arttyrýǵa basty nazar aýdardy. Oqytýshylar qatary ǵylym kandıdattary men doktorlarymen tolyqtyryla bastady. Solardyń biri retinde Máskeý hımııa tehnologııalyq ınstıtýtynda 1984 jyly doktorlyq dıssertasııasyn oıdaǵydaı qorǵap, tehnıka ǵylymdarynyń doktory dárejesi men professor ataǵyn ıelendi.
Shaıahmet Moldabekuly búginde Qazaqstan Ulttyq ınjenerlik akademııasynyń akademıgi, ǵylym men tehnıka salasyndaǵy Memlekettik syılyqtyń laýreaty, joǵary oqý oryndarynyń úzdik oqytýshysy, Ońtústik Qazaqstan oblysynyń (qazirgi Túrkistan oblysy) úzdik ǵalymy, ýnıversıtetimizdegi beıorganıkalyq zattardyń hımııalyq tehnologııasy ǵylymı ortalyǵynyń dırektory, ınabatty ul-qyzdar ósip-óngen órkendi de, ónegeli áýlettiń bas ıesi, nemere men shóbereleriniń jaǵasy jaılaý, qushaǵy qoınaý qazynaly qarty.
Ulaǵatty ustazdyń qajyr-qaıraty áli de bilimdi de bilikti mamandar men ǵalymdar daıyndaýda, kafedra, joǵary mektep, ýnıversıtet jáne óńir men egemen elimizdiń jetistikterin eseleýge, jańa jemisti nátıjelerge jetýge úles qosa berýge jetelesin, jany jaısań, júzi jarqyn, shapaǵaty mol, bergeninen bereri mol Shaıahmet Moldabekulynyń denine saýlyq, boıyna kúsh-qýat quıylyp, shamshyraqtaı aldaǵy býynnyń da tárbıesine shýaǵyn shasha berýine tilektespiz.
Úılesbek BESTEREKOV,
tehnıka ǵylymdarynyń doktory, M.Áýezov atyndaǵy OQMÝ professory, Bilim berý isiniń qurmetti qyzmetkeri,
Aıdarbek BOLYSBEK,
tehnıka ǵylymdarynyń kandıdaty, M.Áýezov atyndaǵy OQMÝ Hımııalyq ınjenerııa jáne bıotehnologııa joǵary mektebiniń dekany
