Aýqymdy mindetter, mańyzdy bastamalar. Birinshi kezekte Elbasynyń jyl basynda jarııalaǵan «Tórtinshi ónerkásiptik revolıýsııa jaǵdaıyndaǵy damýdyń jańa múmkindikteri» atty Joldaýyna toqtala keter bolsaq, onda ındýstrııalandyrýdy jańa tehnologııalardy engizýdiń kóshbasshysyna aınaldyrý syndy mańyzdy máseleler qozǵaldy. Sondaı-aq Elbasy 5 jyl ishinde agroónerkásip keshenindegi eńbek ónimdiligin jáne óńdelgen aýyl sharýashylyǵy óniminiń eksportyn kem degende 2,5 esege arttyrýdy tapsyrdy.
Bulardan bólek, Joldaýda kólik-logıstıka ınfraqurylymynyń tıimdiligin arttyrý, tranzıtten túsetin jyl saıynǵy tabysty 2020 jyly 5 mıllıard dollarǵa jetkizý, aýyldyq eldi mekenderdi sapaly aýyzsýmen qamtamasyz etý úshin barlyq qarajat kózderinen jyl saıyn kem degende 100 mıllıard teńge qarastyrý qajettigi atap kórsetildi.
Áleýmettik tólemderdi, sonyń ishinde zeınetaqyny ósirý 3 mıllıonnan astam qazaqstandyqtyń tabystaryn kóbeıtedi. Múgedekterge, asyraýshysynan aıyrylǵan jáne múgedek balalar tárbıelep otyrǵan otbasylaryna arnalǵan járdemaqylar 16 paıyzǵa deıin ósti. 2018 jyldyń 1 shildesinen bastap bazalyq zeınetaqy eńbek ótiline baılanysty ortasha alǵanda 1,8 ese kóbeıetin bolady (Joldaýdan – red.)».
Sondaı-aq Elbasy 2018 jyldyń 1 shildesinen bastap kámeletke tolǵan, bala kezinen I toptaǵy múgedekterdi baǵyp otyrǵan ata-analar úshin qosymsha memlekettik járdemaqyny engizýdi, muǵalim mártebesin arttyrý maqsatymen bilim berýdiń jańartylǵan mazmunyna kóshken ustazdardyń laýazymdyq jalaqysyn 2018 jyldyń 1 qańtarynan bastap 30 paıyzǵa kóbeıtýdi tapsyrdy.
Biregeı bes bastama. Osy jylǵy 5 naýryzda Elbasy Nursultan Nazarbaevtyń «Prezıdenttiń bes áleýmettik bastamasy» atty halyqqa úndeýi jarııalanyp, ol qoǵam tarapynan úlken qoldaý tapty.
Tarata aıtar bolsaq, atalǵan úndeýde árbir otbasyna baspana alýdyń jańa múmkindikterin berý, jalaqysy tómen jumysshylardyń eńbekaqysyn kóbeıtý úshin olardyń salyq júktemesin azaıtý, joǵary bilim alýdyń qoljetimdiligi men sapasyn arttyryp, stýdent jastardyń jataqhanadaǵy jaǵdaıyn jaqsartý, shaǵyn nesıe berýdi kóbeıtý, eldi gazben qamtamasyz etý jumystaryn jalǵastyrý syndy mańyzdy áleýmettik bastamalar qamtyldy.
Bul kórsetilgen bastamalar boıynsha tıisti sharalar qolǵa alynyp, Úkimet, memlekettik organdar, jergilikti atqarýshy bılik, bıznes-qaýymdastyq jáne azamattyq qoǵam basty mindetterdi oryndaýǵa jumyla kiristi.
Jurtshylyq jyly qabyldaǵan qadamdar. «Qazaqstandyqtardyń əl-aýqatynyń ósýi: tabys pen turmys sapasyn arttyrý» atty Joldaýynda Memleket basshysy birinshi kezekte Úkimetke 2019 jyldyń 1 qańtarynan bastap eń tómengi jalaqyny 1,5 ese, ıaǵnı 28 myńnan 42 myńǵa deıin ósirýdi mindettedi. Munyń túrli menshik nysandaryndaǵy barlyq kásiporyndarda jumys isteıtin 1 mıllıon 300 myń adamnyń eńbekaqysyna tikeleı qatysy bar. Sondaı-aq bıýdjettik mekemelerde jumys isteıtin 275 myń qyzmetkerdiń eńbekaqysy kóbeıip, orta eseppen 35 paıyzǵa ósedi.
Sonymen birge buǵan deıin qabyldanǵan «Bıznestiń jol kartasy-2020» baǵdarlamasyn 2025 jylǵa deıin uzartý máselesi kún tártibine shyǵaryldy. Sol úshin jyl saıyn qosymsha keminde 30 mıllıard teńge bólý qajettigi atap kórsetildi. Bul óz kezeginde 3 jyl ishinde qosymsha keminde 22 myń jańa jumys ornyn ashýǵa, 3 trıllıon teńgeniń ónimin óndirýge múmkindik bermek.
Joldaýda turǵyn úı-kommýnaldyq sharýashylyǵy men tabıǵı monopolııalardyń qyzmeti úshin belgilenetin tarıfter salasynda tártip ornatý maqsatymen batyl sharalar qabyldaý qajettigi de ataldy.
Taǵy bir erekshe toqtala keter jaıt, halyqtyń turmys sapasyn arttyrý baǵytynda mańyzdy mindetter kún tártibine qoıyldy. Sondyqtan 5 jyl ishinde bilim, ǵylym, densaýlyq saqtaý salalaryna barlyq kózderden jumsalatyn qarajatty ishki jalpy ónimniń 10 paıyzyna deıin jetkizý qajettigine ekpin berildi. Qoryta aıtqanda, 2018 jyly da Elbasy tarapynan elimizdiń ýaqyt talabyna saı damýyna keńinen jol ashqan, halyqtyń ál-aýqatyn, turmys sapasyn arttyrýǵa baǵyttalǵan tıimdi bastamalar júzege asyp, olardyń barlyǵy el ıgiligine aınaldy.
Joldybaı BAZAR,
«Egemen Qazaqstan»
