Is sapar barysynda aýdanda bıiktigi 20 metr bolatyn Qazaqstan Respýblıkasynyń Memlekettik Týy ornatylǵan Memlekettik Rámizder alleıasy ashyldy.
Qazaly aýdanynyń ortalyǵy Áıteke bı kentinde Áıteke bı eskertkishi ashyldy. Eskertkishtiń ashylýyna arnaıy О́zbekstan Respýblıkasynyń Naýaı oblysyndaǵy Áıteke bı kesenesinen topyraq ákelindi.
- Respýblıka kóleminde Áıteke bıdi este qaldyrý baǵytynda biraz jumystar atqaryldy. Onyń atynda aýdan, kósheler, aýyl bar. Osy aýdannyń ortalyǵy da – Áıteke bıdiń esimimen atalady. О́tken jyly babamyzdyń eńseli eskertkishin ornatý týraly sheshim qabyldaǵan edik. Búgin mine, Áıteke bıdiń eskertkishi de óz tuǵyryna qondy. Elbasy óziniń «Rýhanı jańǵyrý» baǵdarlamalyq maqalasynda «Patrıotızm eń aldymen týǵan jerge, óz aýylyna, qalasyna, óńirine jáne kishi otanyna degen súıispenshilikten bastaý alady» degen bolatyn. Al, qazaqstandyq patrıotızmdi qalyptastyryp, ilgeri damytý ultymyzdyń uly adamdarynyń úlgi-ónegesin urpaqqa dáripteý arqyly júzege aspaq. Olaı bolsa, Áıteke bıdeı ulylardy ulyqtaý - búgingi urpaqtyń azamattyq paryzy, - dedi oblys ákimi.
Osynda 24 kásipkerlik nysan salý josparlanyp otyr. Sondaı-aq, Qazaly qalasynyń avtomobıl jolyn qaıta jańartý boıynsha jobalyq-smetalyq qujattamasy daıyndaldy. Budan basqa, 600 oryndyq mádenıet úıi men mekemeler qurylysy júrgizilýde. 250 oryndyq 12 eki qabatty turǵynúı qurylysy jobasy daıyndaldy jáne jabyq bazar salýǵa jer ýchaskesi bólindi.
Baqtııar TAIJAN,
«Egemen Qazaqstan»
Qyzylorda oblysy
