Búgin qandasymyzdyń kimmen judyryqtasatyny belgili boldy. Jánibek «Jaldamaly janalǵysh» degen búrkenshik esimmen tanymal Stıven Martınespen aıqasady. 1990 jyly Pýerto-Rıkoda týyp-ósken ol keıinnen AQSh-qa qonys aýdardy. Osy sport túrin serik etkeli 10 jylǵa jýyqtap qaldy. Sol aralyqta 21 kezdesý ótkizip, 18 ret jeńiske jetti. 13 básekeni merziminen buryn aıaqtady. О́ziniń sońǵy jekpe-jegin Martınes ústimizdegi jyldyń 16-naýryzynda amerıkalyq Kortnı Penengtonǵa qarsy ótkizip, utylyp qalǵan bolatyn.
Al Jánibek Álimhanuylynyń júrip ótken jolyn qazaqstandyq jankúıerler jaqsy biledi. Ol – áýesqoılar arasynda álem jáne Azııa chempıony, Azııa oıyndarynyń jeńimpaz. 2016 jyldyń qazan aıynda kásipqoı rıngtegi alǵashqy qadamyn jasap, Almatyda kolýmbııalyq Nýnes Mıltondy birinshi raýndta uryp shyqty. 2017 jyldyń qyrkúıeıeginde Astanada brazılııalyq Jılbertý Pereıra dos Santosty upaı sanymen utty. Odan keıin Jánibek muhıt asyp, Amerıkaǵa attandy. AQSh-ta ol atyshýly Bob Arým jetekshilik etetin áıgili Top Rank promoýterlik kompanııasymen kelsimshartqa otyrdy. Sol kezden beri taǵy eki kezdesý ótkizip, ekeýinde de jeńiske jetti. Qandasymyz tájirıbeli Karlos Galvan (Kolýmbııa) men Aleksander Vonnan (AQSh) basym tústi.
Ǵalym SÚLEIMEN,
«Egemen Qazaqstan»
