Sońǵy málimetterge súıensek, «Pabýk» daýyly Sıam buǵazynan batysqa qaraı baǵyt alǵan. Qazirgi tańda onyń jyldamdyǵy saǵatyna 65 kılometrge jetip otyr.
Taılandtyń Gıdrologııalyq jáne aýylsharýashylyq aqparattar ınstıtýty málimetine súıensek, Nakhonsıthammarat aýdany úlken japa shegýi múmkin. О́ıtkeni, ondaǵy jaǵalaý 220 kılometrge sozylǵan. Nakhonsıthammaratta ákimshiligi daýyldan qorǵaný maqsatynda 86 myń adamǵa pana bolatyn 90 ortalyq daıyndady.
Budan bólek, Sýratthanı, Phatthalýng, Songkhla, Pattanı, Iаla, Narathıvat, Krabı, Trang, Satýn, Prachýapkhırıkhan, Chýmphon, Ranong, Phangnga, Phýket aýyldarynda nóser jańbyr jaýýy múmkin.
«Pabýk» daýyly týraly málimet alý úshin «Egemen Qazaqstan» gazetiniń tilshisi Samýı aralynda demalyp jatqan Novosıbırsk qalasynyń turǵyny Tatıana Kýlmanovaǵa habarlasqan bolatyn. Onyń aıtýynsha, tótenshe jaǵdaıǵa qaramastan, aımaq ákimshiligi eshqandaı shara qabyldamaǵan eken.
«Azyq-túlik pen sý satyp alyp qoıdyq. Jańbyrdan qorǵaıtyn kıimderimiz de janymyzda. Dúkenderdiń jumys kestesi aýyspaly, azyq-túlik azaıǵan. Aral ákimshiligi eshqandaı eskertý jasaǵan joq. Teńizge barýǵa da tyıym salynbady. Tótenshe jaǵdaılar organdarynyń qyzmetkerlerin kórmedik. Alaıda daýyl daýysy birneshe ret estildi. Qonaq úıdiń shatyryna shyǵatyn joldy qarastyryp qoıdyq. Barlyǵy jaqsy aıaqtalady dep senemiz», dedi T.Kýlmanova «Egemen Qazaqstan» gazeti tilshisine bergen suhbatynda.
Qazaqstannyń Syrtqy ister mınıstrligi kórsetken málimetke saı Taılandta 80 qazaqstandyq demalyp jatyr. Áıtse de, vedomstvo ókilderi demalysqa óz betimen, tirkeýsiz kelgender bolýy múmkin ekenin joqqa shyǵarmaıdy. Elshilik ókilderi Samýı, Phýket, Pattaııa araldarynyń qonaq úılerimen baılanys ornatqan. Taılandta demalyp jatqandar qatarynda jýrnalıst Aıgúl Múkeı, ánshi Erke Esmahan jáne bloger Aııa bar. О́kinishke qaraı, «Egemen Qazaqstan» gazetiniń tilshisi Taılandtaǵy otandastarymyzǵa habarlasa alǵan joq.
Daýyl – teńizde kúshti tolqyndar kóteretin, qurlyqta birtalaı apattarǵa sebep bolatyn óte kúshti jel, tropıkalyq sıklon. Ádette Atlant, Tynyq muhıty men Karıb teńiziniń aýmaǵynda bolady. Joıqyn daýyldar muhıt sýynyń temperatýrasy 26 gradýs Selsııden asqanda paıda bolady. Jyly jáne salqyn aýamen árekettesken teńiz sýy tizbekti reaksııa áserinen óz deńgeıinen kóteriledi. Aýa aǵyny saǵat tiline qarsy aınalyp, jel jyldamdyǵy saǵatyna 130 kılometrge deıin jetedi.
Bir qyzyǵy, jyldamdyǵy saǵatyna 62 kılometrden asqan daýyldarǵa ǵana at beriledi eken. 178 kılometrden asqan daýyldar úshinshi kategorııalyq daýyldarǵa jatqyzylady. Olardyń kúshi ǵımarattardy qulatýǵa jetedi. Bir aımaqta birneshe tropıkalyq sıklondar kezdeskendikten, olardy shatastyrmaý úshin naqty esim qoıylady. Bul aýa raıy boljamyn jasaýǵa, daýyl jaǵdaıy týraly eskertýler jasaý úshin mańyzdy. Daýyldarǵa esim berý 1852 jyly bastaý alǵan.
Svetlana Ǵalymjanqyzy,
«Egemen Qazaqstan»
