Oblystyq ákimdik sońǵy úsh jylda oblys pen aýdan aýrýhanalaryn halyqaralyq standarttarǵa sáıkes keletin jabdyqtarmen qamtamasyz etý úshin 18,8 mıllıard teńge qarjy bólgeni belgili. Iske asyrylǵan baǵdarlama aıasynda óńirdiń densaýlyq saqtaý basqarmasy ana men bala, qanaınalym júıesiniń aýrýlary, onkologııa, travmotologııa men ortopedııa baǵytynda tájirıbeli sarapshylardy tarta otyryp, keshendi aýdıt sharalar júrgizgen. Nátıjesinde 2018 jyly О́skemen qalasynda elimizdegi tuńǵysh robotty hırýrgııa jáne transplantolgııa ortalyǵy, Altaı men Aıagóz aýdandarynda ınsýlt ortalyqtary, Semeı qalasynda ortopedııa jáne polıtravma ortalyǵy men jedel medısınalyq kómek aýrýhanasynyń negizinde neırohırýrgııaǵa arnalǵan gıbrıdtik ota jasaý bólmesi qurylyp, halyqqa paıdasyn tıgize bastady. Munymen qosa, medısınalyq qyzmetkerlerdi el ishi men shetelde oqytý boıynsha naqty sharalar qabyldanyp, arnaıy baǵdarlama iske asyrylýda. Onyń maqsaty 2020 jylǵa deıin mýltıpándik brıgadalar prınsıpimen keminde 300 mamannyń quzirettiligin arttyryp, biliktilikterin jetildirý. Sońǵy eki jyldyń ózinde 153 maman Ulybrıtanııa, Germanııa, Japonııa jáne Polsha elderiniń jetekshi klınıkalarynda oqýdan óken.
Bilim men densaýlyq saqtaý salalaryna qomaqty qarjy baǵyttalyp otyrǵanyn tilge tıek etken aımaq basshysy Astananyń jetekshi ortalyqtaryna oblystyń aýrýhanalarynda fılıaldar ashýdy, strategııalyq árekettestiktiń ózge de joldaryn qaraýdy usyndy. Mundaǵy basty maqsat – shyǵysqazaqstandyq klınıkalardyń elimizdegi jetekshi ortalyqtarmen jan-jaqty seriktestigin nyǵaıtý arqyly zamanaýı medısınanyń oń tájirıbelerin basshylyqqa ala otyryp, óńirlik deńgeıde joǵary sapaly medısınalyq qyzmet kórsetýdi qamtamasyz etý.
О́ńirdiń medısınalyq ortalyqtary Astana deńgeıinen esh kem emestigin erekshe atap ótken elimizdiń jetekshi ortalyqtarynyń basshylary oblysta qolǵa alynǵan naqty sharalardyń ózge óńirlerge úlgi bolatyndyǵyn, sońǵy jyldary Shyǵys Qazaqstan oblysymen josparly túrde jemisti qyzmet jasap otyrǵandaryn baıandady. Atap aıtqanda, Ulttyq ǵylymı kardıohırýrgııa ortalyǵynyń basqarma tóraǵasy Iý.Pıa respýblıkalyq ortalyqtardyń Shyǵys Qazaqstannyń jetekshi klınıkalarymen ózara strategııalyq árekettestigi sapa deńgeıin arttyryp, óńir jurtshylyǵyna medısınalyq kómektiń qoljetimdiligin qamtamasyz etetindigine toqtalsa, Ulttyq neırohırýrgııa ortalyǵynyń basqarma tóraǵasy S.Aqsholaqov ınsýlt ortalyqtaryn qurý jónindegi óńirlik jol kartasynyń tıimdiligin atap ótti. Travmatologııa jáne ortopedııa ǵylymı-zertteý ortalyǵynyń dırektory N.Batpenov Semeı qalasynda ortopedııa jáne polıtravma ortalyǵynyń jabdyqtalý deńgeıin joǵary baǵalap, 2018 jylǵy jeltoqsan aıynda ortalyq mamandarymen býyndardy endoprotezdeý jáne tize býynynyń baılanystyrýshy apparatyn qalpyna keltirý boıynsha ota jasap, sheberlik-saǵattaryn ótkizgendigin aıtty.
Kezdesý sońynda О́skemen qalasynda qorytyndy keńes ótkizý, klınıkalar arasyndaǵy strategııalyq árekettestikti nyǵaıtý jóninde Densaýlyq saqtaý basqarmasyna tapsyrma berilip, tanysý úshin astanalyq ortalyqtarǵa joldanǵan tıisti sharttardy rásimdeý týraly sheshim qabyldandy.
Azamat QASYM,
«Egemen Qazaqstan»
О́SKEMEN
